தெற்கு ரயில்வே பாதுகாப்புப் படையில் ஒரே நாளில் 926 பேர் இடமாற்றம்

தெற்கு ரயில்வே மண்டலத்தில் உள்ள ரயில்வே பாதுகாப்புப் படைப் பிரிவில் ஒரே நாளில் ஆய்வாளர், உதவி ஆய்வாளர், காவலர் என மொத்தம் 926 பேர் இடமாற்றம் செய்யப்பட்டுள்ளனர்.

- 

தெற்கு ரயில்வே மண்டலத்தில் 36 ரயில்வே பாதுகாப்புப் படை நிலையங்கள் மற்றும் 10-க்கும் மேற்பட்ட உதவி மையங்கள் உள்ளன. ரயில்வே துறை சொத்துகளுக்கும், பயணிகளுக்கும் பாதுகாப்பு அளிக்கும் வகையில் ரயில்வே பாதுகாப்புப் படையினர் (ஆர்பிஎஃப்) செயல்பட்டுவருகின்றனர். அவர்களுக்கான இடமாறுதல் உத்தரவு தெற்கு ரயில்வே பாதுகாப்புப் படையின் சென்னை தலைமை பாதுகாப்பு அதிகாரியால் அண்மையில் பிறப்பிக்கப்பட்டுள்ளது. அதன்படி, 548 காவலர்கள், 259 தலைமைக் காவலர்கள், 80 உதவி சார்பு ஆய்வாளர்கள், 39 ஆய்வாளர்கள் என மொத்தம் 926 பேர் இடமாற்றம் செய்யப்பட்டுள்ளனர். அவர்கள் இரு நாள்களில் பணியில் சேரவேண்டும் எனவும் உத்தரவிடப்பட்டுள்ளது.