தடையை மீறி நெகிழிப் பொருள்கள் உற்பத்தி: தமிழக உள்துறைச் செயலர் பதிலளிக்க உத்தரவு

தமிழகத்தில் தடையை மீறி நெகிழிப் பொருள்களை உற்பத்தி செய்யும் நிறுவனங்கள் மீது நடவடிக்கை எடுக்கக் கோரிய வழக்கில், மாநில உள்துறைச் செயலர் பதிலளிக்க சென்னை உயர்நீதிமன்ற மதுரை அமர்வு வெள்ளிக்கிழமை உத்தரவிட்டது.

- 

மதுரை, ஜூலை 4:

ராமநாதபுரம் மாவட்டம், கமுதியைச் சேர்ந்த கோ. சிரஞ்சீவி சென்னை உயர்நீதிமன்ற மதுரை அமர்வில் தாக்கல் செய்த மனு: நான் வேளாண் தொழில் செய்து வருகிறேன். நாம் வாழும் இந்த பூமி மனிதர்களுக்கு மட்டுமன்றி, அனைத்து வகையான உயிர்களுக்கும் சொந்தமானது. இதை உணராமல் இயற்கையைச் சீரழிக்கும் நிகழ்வுகள் அரங்கேறி வருகின்றன.

குறிப்பாக, மறுசுழற்சி செய்ய முடியாத நெகிழிப் பொருள்கள் இயற்கை வளத்தைச் சீரழித்து வருகின்றன. உணவகங்களில் வழங்கப்படும் நெகிழிப் பொருள்களால் புற்றுநோய் உருவாகும் சூழல் ஏற்படுகிறது. இதுமட்டுமன்றி, ஆங்காங்கே கொட்டப்படும் நெகிழிப் பொருள்களை உண்ணும் கால்நடைகளும் மிகுந்த பாதிப்புக்குள்ளாகின்றன.