வள்ளுவத்தில் 'வான்'

தமிழகம் வள்ளுவரால் வான்புகழ் பெற்றது. திருக்குறளால் நம் மண்ணுக்குப் பெருமை; வளமை.

- செஞ்சி. கோ.தமிழரசன்

திருவள்ளுவர் தம் குறள்பாவில் சில சொற்களைப் பலமுறை பயன்படுத்தும் உத்தி பெற்றவர். உயர் பொருள் தருபவர். அந்த நிலையில் 'கடவுள் வாழ்த்து' முதலில் எழுதியவர் அடுத்து 'வான்சிறப்பு' எழுதியுள்ளார். 'வான்', 'வானம்' ஆகிய சொற்களை குறளில் காண முடிகிறது. 'விண்', 'விசும்பு' என்றும் குறிப்பிடுகிறார்.

வான்நின்று உலகம் வழங்கி வருதலால் தான் அமிழ்தம் என்றுணரற் பாற்று. (குறள்-11)

இந்தக் குறளில் 'வான்' சொல்லாட்சி முதலாவதாக இடம் பெற்றுள்ளது. உலகத்தில் மக்களும், பிற உயிர்களும் வாழ மழை அமிழ்தமாக விளங்குகிறது என்பது வள்ளுவப் பெருந்தகையின் பெருமித உணர்வாகும்.

மழை பெய்யாமல் பொய்க்குமானால் பசும் புல்லும் தலை காட்டாது; இவ்வுலகத்தில் தானமும், தவமும் இல்லாமல் போகும் எனக் கூறும் வள்ளுவர், வானவர்க்கு நடக்கும் பெருவிழாக்களாம் திருவிழாக்கள், நாளும் செய்யும் இறை வழிபாடு முதலியனவும் நடைபெறா என்கிறார்.