பயங்கரவாதத் தாக்குதலைக் கண்டித்து காஷ்மீரில் முழு அடைப்பு

கடந்த 35 ஆண்டுகளில் முதல்முறை

- 

ஸ்ரீநகர், ஏப். 23: காஷ்மீர் பள்ளத்தாக்கு பிராந்தியத்தில் கடந்த 35 ஆண்டுகளில் முதல்முறையாக பயங்கரவாதத் தாக்குதலைக் கண்டித்து புதன்கிழமை முழு அடைப்பு அனுசரிக்கப்பட்டது.

இதற்கு பல்வேறு வர்த்தக, சமூக அமைப்புகள், அரசியல் கட்சிகள், மத அமைப்புகள் ஆதரவு தெரிவித்தனர்.

தலைநகர் ஸ்ரீநகர் உள்பட காஷ்மீர் பள்ளத்தாக்கு முழுவதும் பாதுகாப்பு அதிகரிக்கப்பட்டுள்ளது. முக்கியமாக சுற்றுலா தலங்களில் கூடுதல் வீரர்கள் குவிக்கப்பட்டுள்ளனர்.

காஷ்மீர் பள்ளத்தாக்கு முழுவதும் கடைகள், பெட்ரோல் நிலையங்கள் உள்ளிட்ட வர்த்தக நிறுவனங்கள் புதன்கிழமை மூடப்பட்டிருந்தன. இதனால் பொது போக்குவரத்து வாகனங்கள் குறைவாகவே இயக்கப்பட்டன.

தனியார் பள்ளிகளுக்கு விடுமுறை அறிவிக்கப்பட்ட நிலையில், அரசுப் பள்ளிகள் வழக்கம்போல இயங்கின. பயங்கரவாதத் தாக்குதலைக் கண்டித்து பல இடங்களில் அமைதி ஊர்வலமும் நடைபெற்றது.