கல்விக் கடன் வழங்க லஞ்சம்: வங்கிப் பணியாளருக்கு 4 ஆண்டுகள் சிறை

உயர்நீதிமன்றம் உத்தரவு

- 

மதுரை, மார்ச் 17: தூத்துக்குடி மாவட்டத்தில் கல்விக் கடன் வழங்க லஞ்சம் பெற்ற வங்கிப் பணியாளருக்கு 4 ஆண்டுகள் சிறைத் தண்டனை, ரூ.1.50 லட்சம் அபராதம் விதித்து சென்னை உயர்நீதிமன்ற மதுரை அமர்வு திங்கள்கிழமை உத்தரவிட்டது.

தூத்துக்குடி மாவட்டம், நாசரேத்தில் உள்ள அரசுடைமை வங்கியில் முதுநிலை மேலாளராகப் பணிபுரிந்தவர் சாமுவேல் ஜெபராஜ். இதே வங்கியில் தற்காலிகப் பணியாளராகப் பணிபுரிந்தவர் நாராயணன் (63). இந்தப் பகுதியைச் சேர்ந்த பெண் ஒருவர் தனது மகள் செவிலியர் படிப்பில் சேர கல்விக் கடன் கேட்டு, கடந்த 2010-ஆம் ஆண்டு விண்ணப்பித்தார். கல்விக் கடனுக்கான வரைவு காசோலை வழங்க முதுநிலை மேலாளர் சாமுவேல் ஜெபராஜ் அறிவுறுத்தலின் பேரில், தற்காலிகப் பணியாளர் நாராயணன் லஞ்சம் வாங்கினார். இருவரையும் சிபிஐ போலீஸார் கைது செய்தனர்.