சட்டங்கள், ஆட்சிகள் யாருக்காக?

எந்த நாட்டில் மக்கள் தாங்கள் உயிரோடு இருப்பதற்கு போதுமான கூலியோடு நிறைவடைகிறார்களோ, அந்த நாடே உலகப் பெருமுதலாளிகளின் நாடு! தொழிலாளர்களைச் செக்கிழுக்கும் மாடுகளுக்கு நிகராக நடத்துவார்கள்! உயிர் வாழப் போதுமான சோறு! குறைந்த நேர ஓய்வு! அவ்வளவுதான்!

- பழ.கருப்பையா

இந்தியாவின் வளர்ச்சி வலுவாக இருக்கிறது; பணவீக்கம் கீழ்நிலையில்; ரூபாயின் மதிப்பு நிலையாய் இருக்கிறது என நம்முடைய நிதியமைச்சர் நிர்மலா கையை உயர்த்திப் பேசலாம்! நிர்மலா தமிழ்நாட்டைச் சேர்ந்தவர்; தமிழ், ஆங்கிலம், இந்தி மூன்றும் தெளிவாகவும் சரளமாகவும் பேசக் கூடிய முதல் பெண் நிதியமைச்சர். அதிகமான நிதிநிலை அறிக்கைகளைத் தாக்கல் செய்த பெருமைக்குரியவர்.

தமிழர்களான நிர்மலா அம்மையாரும், செய்சங்கரும் வேறு மாநிலங்களிலிருந்து தான் வண்டி ஏறித் தில்லிக்கு செல்கிறார்கள்! நிர்மலா அம்மையாரின் காலத்தில் பொருளாதார வளர்ச்சி நிலை வரிசையில் உலக அளவில் பதினொன்றாவது இடத்திலிருந்த இந்தியா, பல நாடுகளைப் பின்னுக்குத் தள்ளி, ஐந்தாவது இடத்திற்கு வந்திருக்கிறது என்றால் அது வியத்தகு வளர்ச்சிதானே! அது இந்த ஆண்டு சப்பானைப் பின்னுக்கு உட்காரச் சொல்லி, நான்காம் இடத்திற்கு முந்திக் கொண்டிருக்கிறது!

தமிழ்நாடு சுழிநிலையிலிருந்து ஒன்பது விழுக்காட்டு வளர்ச்சியையும், தன் நான்கு ஆண்டு கால ஆட்சியிலேயே பெற்று விட்டது என்பதுபோல முதல்வர் இசுடாலின் பேசும்போது, உலக அரங்கில் இந்தியா நான்காவது இடத்திற்கு வந்தது தன்னால்தான் என்று நிர்மலா அம்மையார் பேசக் கூடாதா?

சரக்கு மற்றும் சேவை வரி விதிப்பு முறையில் விளையாட்டு விதிகள் மாறி விட்டன. ஒரு சாதாரணக் கடையில், சாதாரணத் தோசை தின்பதற்கு ஐந்து ரூபாயிலிருந்து எட்டு ரூபாய் வரை, அடித்தட்டு மனிதன் வரிக் கொடுக்கும் கொடுமை இன்றைக்கு இருக்கிறது!

நடிகர் விசய், அண்ணாமலைக்கெல்லாம் 'ஒய்' பிரிவு பாதுகாப்பு; அதாவது ஏறத்தாழ இருபத்தெட்டுப் பேர் கொண்ட படையின் பாதுகாப்புத் தேவைப்படுவதால், நாம் ஒவ்வொரு தோசையோடும் ரூபாய் எட்டு வரை வரிக் கொடுக்க வேண்டியதிருக்கிறது!

காலையில் விழித்தவுடன் கடைசித் தரத் தேயிலைத் தூளில் போடப்படும் அரை கிளாசு டீக்கும் தேயிலை வழியாக வரி; அதன் பின்னால் ஒரு பீடியை எடுத்து வாயில் வைத்தால் அதற்கும் வரி; அதைப் பற்ற வைக்கத் தீக்குச்சியை உரசினால் அதற்கும் வரி!