முன்னேற்றமாகும் மாற்றம்

சர்வதேச கல்விச் சூழலுக்கு நமது மாணவர்கள் தயாராக ஏதுவாக தேசிய கல்விக் கொள்கை அமைந்துள்ளது. வெளிநாடுகளுக்குச் சென்று கல்வி பயில விரும்பும் மாணவர்களின் கனவு நனவாக தேசிய கல்விக் கொள்கை வாய்ப்பளிக்கிறது.

- கோதை ஜோதிலட்சுமி

நம் தேசத்தின் சிறந்த அறிஞர்கள் கல்வியில் சிறப்பான பயிற்சியைப் பெற வேண்டும் என்று தீர்மானித்திருக்கிறார்கள். மாநிலங்கள் அவர்களுக்கென கல்வி முறை பாடத்திட்டம் என வைத்துக் கொண்டிருந்தாலும், இந்தியா முழுவதையும் இணைக்கும் ஓர் பாடத்திட்டமும் அவசியம் என்பதை நமது அறிஞர்கள் சிந்தித்துள்ளனர்.

இதுவரை நாம் பின்பற்றிக் கொண்டிருக்கும் கல்விக் கொள்கை 1986-ஆம் ஆண்டு உருவாக்கப்பட்டது. 39 ஆண்டுகள் கடந்துவிட்டன. 1992-ஆம் ஆண்டு பிரதமராக இருந்த பி.வி.நரசிம்மராவ் கல்விக் கொள்கையில் சிறிய மாற்றங்களைச் செய்தார். மாறிவரும் சூழலுக்கு ஏற்பவும் அறிவியல் முதலான முன்னேற்றங்களுக்கு ஏற்பவும் மாற்றங்களைச் செய்ய வேண்டியதன் அவசியத்தை உணர்ந்து தற்போது தேசிய கல்விக் கொள்கை 2020-ஆம் ஆண்டு உருவாக்கப்பட்டு நடைமுறைப்படுத்தப்பட்டு வருகிறது.

எந்த சமுதாயமும் முன்னேறுவதற்கு கல்வி அடிப்படையானது. கல்வியின் தரம் உயர வேண்டும் என்ற நோக்கத்தோடு தேசிய கல்விக் கொள்கையை மத்திய அரசு உருவாக்கியுள்ளது. 1986-ஆம் ஆண்டு உருவாக்கப்பட்ட கல்விக் கொள்கை அனைவருக்கும் கல்வியை உறுதிப்படுத்த வேண்டும் என்ற சிந்தனையோடு உருவாக்கப்பட்டது.

தற்போதைய கல்விக் கொள்கை உலகளாவிய போட்டியை எதிர்கொள்ளும் வகையில் உருவாக்கப்பட்டுள்ளது.

பல மாநிலங்கள் மத்திய அரசின் கல்விக் கொள்கையை அப்படியே ஏற்றுக்கொண்டாலும் சில மாநிலங்கள் தங்களுக்கென உருவாக்கிக் கொண்டிருக்கும் கல்விக் கொள்கையைப் பின்பற்றுகின்றன. கொள்கை அடிப்படையில் பெரும்பாலும் மத்திய மாநில அரசுகளின் கல்விக் கொள்கைகளில் பெரிய மாறுபாடுகள் இருப்பதில்லை.

பாடங்களின் அடிப்படையிலும் அறிவியல், கணிதம் போன்ற பாடங்களில் வேறுபாடுகள் இல்லை. ஆனால், மொழிப்பாடங்கள், வரலாறு போன்றவற்றில் மாநில அரசுகளுக்கும் மத்திய அரசின் தேசிய கல்விக் கொள்கைக்கும் இடையில் முரண்பாடுகள் தோன்றுகின்றன. மாநிலங்கள் தங்கள் தனித்தன்மைக்கு அதிக முக்கியத்துவம் தர முயல்வதில் வேறுபாடுகள் தோன்றுகின்றன.