கிருஷ்ணராஜசாகர் அணை நிரம்பியது முதல்வர் சித்தராமையா சிறப்பு பூஜை செய்து வழிபாடு

கர்நாடக மாநிலத்தில் காவிரி ஆற்றில் கட்டப்பட்டுள்ள கிருஷ்ணராஜ சாகர் அணையின் நீர்மட்டம் அதன் முழு கொள்ளளவு 124.80 அடியை எட்டியதைத் தொடர்ந்து, முதல்வர் சித்தராமையா திங்கள்கிழமை சிறப்பு பூஜை செய்து வழிபட்டார்.

- 

மண்டியா, ஜூன் 30:

கடந்த பல வாரங்களாக கர்நாடகத்தில் தென்மேற்குப் பருவமழை பரவலாக பெய்து வருகிறது. இதனால் மாநிலத்தில் உள்ள கபினி, துங்கபத்ரா, ஹேமாவதி, ஹாரங்கி, அல்மாட்டி, நாராயணபுரா, லிங்கனமக்கி உள்ளிட்ட அணைகள் அதன் முழு கொள்ளளவை எட்டியுள்ளன. இது விவசாயிகளுக்கு உற்சாகத்தை ஏற்படுத்தியுள்ளது.

இந்நிலையில், காவிரியில் கட்டப்பட்டுள்ள கிருஷ்ணராஜ சாகர் அணை 92 ஆண்டுகளுக்குப் பிறகு ஜூன் மாதத்தில் அதன் முழு கொள்ளளவை ஞாயிற்றுக்கிழமை எட்டியது.

காவிரியின் நீர்ப்பிடிப்புப் பகுதிகளான குடகு மாவட்டத்தில் மடிகேரி, பாகமண்டலா பகுதிகளில் தொடர்ந்து பலத்த மழை பெய்து வருவதால் காவிரியில் வெள்ளப்பெருக்கு ஏற்பட்டுள்ளது. காவிரி கரையோரம் வசிக்கும் மக்கள் பாதுகாப்பான இடங்களுக்குச் செல்லுமாறு மாவட்ட நிர்வாகம் கேட்டுக்கொண்டுள்ளது.