இந்திய நலனில் சமரசமில்லை

டிரம்ப்புக்கு பிரதமர் மோடி பதில்

- 

புது தில்லி, ஆக. 7: இந்தியாவின் நலனில் சமரசம் செய்துகொள்ள முடியாது என்று பிரதமர் மோடி திட்டவட்டமாக தெரிவித்தார்.

இந்தியாவின் வேளாண் மற்றும் பால் உற்பத்தி சந்தையில் அமெரிக்கா விரிவான அணுகலைக் கோருவதால், இருதரப்பு வர்த்தக பேச்சுவார்த்தைகளில் முட்டுக்கட்டை நிலவுகிறது. இந்தச் சூழலில், பிரதமர் மோடியின் மேற்கண்ட கருத்துகள், இந்தியாவின் நிலைப்பாட்டை உறுதி செய்வதோடு, அதிபர் டிரம்ப்புக்கான மறைமுக பதிலாகவும் அமைந்துள்ளது.

இந்தியா-அமெரிக்கா இடையே வர்த்தக ஒப்பந்த பேச்சுவார்த்தை நடைபெற்றுவரும் சூழலில், இந்தியா மீதான இறக்குமதி வரியை இரு மடங்காக உயர்த்தி (50%), அதிபர் டிரம்ப் புதன்கிழமை அதிரடி அறிவிப்பை வெளியிட்டார்.

இது, இந்தியாவின் கடல்சார் பொருள்கள், ஜவுளி, தோல் பொருள்கள் உள்ளிட்டவற்றின் ஏற்றுமதியில் பெரும் பாதிப்பை ஏற்படுத்தும் எனக் கருதப்படுகிறது.