குடியுரிமை ஆவணமாக ஆதார், குடும்ப அட்டை

பிகாரில் வாக்காளர் பட்டியல் சிறப்பு தீவிர திருத்தத்தின்போது, வாக்காளர்களின் குடியுரிமை ஆவணமாக ஆதார், குடும்ப அட்டை, வாக்காளர் அட்டை ஆகியவற்றை தேர்தல் ஆணையம் ஏற்றுக்கொள்ள வேண்டும் என உச்சநீதிமன்றம் வியாழக்கிழமை பரிந்துரை செய்தது.

- 

புது தில்லி, ஜூலை 10:

அதேவேளையில், இந்தப் பணியை முன்கூட்டியே மேற்கொள்ளாமல் தேர்தல் நெருங்கும் நேரத்தில் மேற்கொள்வது ஏன் என்று தேர்தல் ஆணையத்துக்குக் கேள்வியும் எழுப்பியது.

பிகாரில் நிகழாண்டு இறுதியில் சட்டப்பேரவைத் தேர்தல் நடைபெறவுள்ள நிலையில், மாநில வாக்காளர் பட்டியல் சிறப்பு தீவிர திருத்தம் செய்யும் பணியை தேர்தல் ஆணையம் மேற்கொண்டு வருகிறது. இதில், மாநிலத்தில் கடந்த 2003-ஆம் ஆண்டு ஜனவரி 1-ஆம் தேதி வெளியிடப்பட்ட வாக்காளர் பட்டியலில் இடம்பெற்றவர்கள், எந்தவொரு ஆதார ஆவணங்களையும் சமர்ப்பிக்கத் தேவையில்லை. ஆனால், அந்தப் பட்டியலில் இடம்பெறாத வாக்காளர்கள், தங்களின் குடியுரிமையை நிரூபிக்க பிறப்புச் சான்றிதழ், கடவுச் சீட்டு (பாஸ்போர்ட்) நகல் போன்ற கூடுதல் ஆவணங்களைச் சமர்ப்பிக்க வேண்டும் என்று தேர்தல் ஆணையம் அறிவித்தது.

இதற்கு கடும் எதிர்ப்பு தெரிவித்த எதிர்க்கட்சிகள், தேர்தல் ஆணையம் தன்னிச்சையாகப் பிறப்பித்துள்ள இந்த உத்தரவு, லட்சக்கணக்கான வாக்காளர்களின் வாக்குரிமையைப் பறித்து, சுதந்திரமான, நியாயமான முறையில் தேர்தல் நடைபெறுவதைச் சீர்குலைக்கும் அபாயம் உள்ளது என்று குற்றஞ்சாட்டின.