திமுக ஆட்சியில் பெண்கள், மாணவர்களுக்குப் பாதுகாப்பில்லை

ஐஜேகே நிறுவனர் பாரிவேந்தர்

- 

திமுக ஆட்சியில் பெண்கள், மாணவர்களுக்கு பாதுகாப்பில்லை என்று இந்திய ஜனநாயக கட்சி (ஐஜேகே) நிறுவனர் பாரிவேந்தர் குற்றஞ்சாட்டினார்.

கடலூர் மாவட்டம், வேப்பூரை அடுத்துள்ள பாசார் கிராமத்தில் அந்தக் கட்சியின் 4-ஆவது மாநில மாநாடு ஞாயிற்றுக்கிழமை நடைபெற்றது. மாநாட்டுக்கு தலைமை வகித்து பாரிவேந்தர் பேசியதாவது:

இந்திய ஜனநாயக கட்சி தொடங்கியது முதல் 15 ஆண்டுகளில் நடந்த அனைத்து தேர்தலிலும் போட்டியிட்டுள்ளோம். கட்சி தொடங்கிய 8-ஆவது மாதத்திலேயே 2011-ஆம் ஆண்டு சட்டப்பேரவைத் தேர்தலில் 131 வேட்பாளர்களைக் களமிறக்கினோம். எந்த ஒரு கட்சியும் தொடங்கப்பட்ட 8 மாதங்களில் 131 வேட்பாளர்களை தேர்தலில் நிறுத்துவது எளிதான காரியமல்ல.