காஸாவில் 6 செய்தியாளர்கள் படுகொலை

இஸ்ரேல் பொறுப்பேற்பு

- 

டேய்ர் அல்-பாலா, ஆக. 11: காஸாவில் பிரபல செய்தியாளர் அனஸ் அல்-ஷரீஃபை குறிவைத்து இஸ்ரேல் ராணுவம் நடத்திய வான்வழித் தாக்குதலில் அவர் உள்பட 6 செய்தியாளர்கள் உயிரிழந்தனர்.

காஸா நகரில் உள்ள அல்-ஷிபா மருத்துவமனை அருகே செய்தியாளர்களுக்காக அமைக்கப்பட்டிருந்த தற்காலிக கூடாரத்தின் மீது இந்தத் தாக்குதல் நடத்தப்பட்டது.

இது குறித்து பிபிசி ஊடகம் தெரிவித்ததாவது: அல்-ஜஸீரா ஊடகத்தின் மூத்த செய்தியாளராகப் பணியாற்றிவந்த அனஸ் அல்-ஷரீஃப் அனைவராலும் நன்கு அறியப்பட்டவர். அவரை குறிவைத்து இஸ்ரேல் படையினர் அவர் தங்கியிருந்த கூடாரத்தில் வான்வழித் தாக்குதல் நடத்தினர்.

இதில் அவர் மட்டுமின்றி, அல்-ஜஸீராவில் பணியாற்றிவந்த மேலும் ஒரு செய்தியாளர் முகமது குரேகியா, மூன்று ஒளிப்பதிவு செய்தியாளர்களும் உயிரிழந்தனர். இது தவிர, அங்கிருந்த சுயாதீன செய்தியாளர் (ஃப்ரீலான்ஸர்) ஒருவரும் இந்தத் தாக்குதலில் உயிரிழந்தார்.