மதுரை ஆதீனத்திடம் இணையவழி குற்றத் தடுப்புப் பிரிவு போலீஸார் விசாரணை

மதுரை ஆதீனத்திடம் சென்னை கிழக்கு மண்டல இணையவழி குற்றத் தடுப்புப் பிரிவு போலீஸார் ஞாயிற்றுக்கிழமை விசாரணை மேற்கொண்டனர்.

- 

மதுரை, ஜூலை 20:

மதுரை ஆதீனத்தின் 293-ஆவது குருமகா சந்நிதானம் ஸ்ரீலஸ்ரீ ஹரிஹர ஸ்ரீ ஞானசம்பந்த தேசிக சுவாமிகள் சென்னை காட்டாங்குளத்தூரில் நடைபெற்ற சைவ சித்தாந்த நிகழ்ச்சியில் பங்கேற்பதற்காக கடந்த மே 2-ஆம் தேதி மதுரையிலிருந்து சென்னைக்கு காரில் சென்றார்.

உளுந்தூர்பேட்டை அருகே சென்ற போது, அவரது கார் லேசான விபத்துக்குள்ளானது.

இந்த விபத்து, மாற்று மத அடையாளங்களுடன் வந்தவர்களால் தன்னை கொலை செய்ய நிகழ்த்தப்பட்ட சதி என மதுரை ஆதீனம் தெரிவித்தார். இதையடுத்து, ஒரு சில ஆதீனங்களும், அரசியல் கட்சியினரும் கார் விபத்து குறித்து கண்டனம் தெரிவித்தனர்.

இதனிடையே, விபத்து நடைபெற்ற பகுதியில் உள்ள கண்காணிப்பு கேமரா பதிவுகளை கைப்பற்றி உளுந்தூர்பேட்டை போலீஸார் ஆய்வு செய்தனர். அப்போது, கார் விபத்து நேரிட்ட இடத்தில் கொலை முயற்சி சம்பவம் ஏதும் நடைபெற்றதற்கான பதிவுகள் இல்லை எனத் தெரியவந்தது.

உடனடியாக, அந்தப் பதிவை ஊடகங்களுக்கு வெளியிட்ட காவல் துறையினர், கார் விபத்து குறித்து மதுரை ஆதீனம் தவறான தகவல்களைத் தெரிவிப்பதாக அறிக்கை வெளியிட்டனர்.