காலை உணவுத் திட்டம் எதிர்கால முதலீடு

காலை உணவுத் திட்டத்துக்காக செலவிடும் தொகை, எதிர்கால சமூகத்தை கட்டமைப்பதற்கான முதலீடு என்று முதல்வர் மு.க.ஸ்டாலின் பெருமிதத்துடன் தெரிவித்தார்.

- முதல்வர் ஸ்டாலின் பெருமிதம்

சென்னை, ஆக. 26: நகர்ப்புறங்களில் உள்ள அரசு உதவி பெறும் பள்ளிகளிலும் காலை உணவுத் திட்டத்தை சென்னை மயிலாப்பூரில் உள்ள புனித சூசையப்பர் பள்ளியில் செவ்வாய்க்கிழமை அவர் தொடங்கி வைத்துப் பேசியதாவது:

கல்வி அறிவை வழங்குவதற்கு மட்டும் பள்ளிகள் இருக்கக் கூடாது, அவர்கள் வயிற்றுப் பசியையும் போக்க வேண்டும். இந்த எண்ணத்தில்தான் காலை உணவுத் திட்டம் தொடங்கப்பட்டது.

இந்தத் திட்டத்தின் கீழ், இதுவரை 17 லட்சம் மாணவ, மாணவியர் பயன்பெற்று வருகின்றனர். இதன் அட்டகாசமான வெற்றி, அது கொடுக்கக்கூடிய அபாரமான விளைவுகளைப் பார்த்து, நகர்ப்புற பகுதிகளில் செயல்படுகின்ற 2,429 அரசு உதவி பெறும் பள்ளிகளுக்கும் விரிவாக்கம் செய்துள்ளோம். இதனால், கூடுதலாக 3 லட்சத்து 6 ஆயிரம் குழந்தைகள் பயன்பெற உள்ளனர்.

இதன் மூலம் ஒட்டுமொத்தமாக தமிழ்நாட்டில் செயல்படுகின்ற 37,416 அரசு மற்றும் அரசு உதவி பெறும் தொடக்கப் பள்ளிகளில் படிக்கின்ற 20 லட்சத்து 59 ஆயிரம் மாணவர்கள் தினமும் காலை யில் சூடான, சுவையான, சத்தான உணவு சாப்பிட்டு, தெம்பாக வகுப்பறைகளுக்குச் செல்வர்.