பாகிஸ்தானுடனான சண்டையின்போது அணு ஆயுத அச்சுறுத்தல் எழவில்லை: மிஸ்ரி

'இந்தியா-பாகிஸ்தான் இடையேயான ராணுவ சண்டை வழக்கமான முறையிலேயே நடைபெற்றது; அணு ஆயுத அச்சுறுத்தல் எதுவும் எழவில்லை' என்று வெளியுறவுச் செயலர் விக்ரம் மிஸ்ரி தெரிவித்தார்.

- 

புது தில்லி, மே 19:

மேலும், 'சண்டை நிறுத்தம் இருதரப்பு பேச்சு மூலமே மேற்கொள்ளப்பட்டது' என்றும் அவர் குறிப்பிட்டார்.

பஹல்காம் பயங்கரவாத தாக்குதலுக்குப் பிறகு இந்தியா-பாகிஸ்தான் ராணுவத்துக்கு இடையே ஏற்பட்ட சண்டை தொடர்பாக நாடாளுமன்ற நிலைக் குழு முன் திங்கள்கிழமை ஆஜராகிய மிஸ்ரி இந்த விளக்கத்தை அளித்தார்.

காங்கிரஸ் எம்.பி. சசி தரூர் தலைமையிலான இந்த நிலைக் குழுவில் திரிணமூல் காங்கிரஸ் எம்.பி. அபிஷேக் பானர்ஜி, காங்கிரஸ் எம்.பி.க்கள் ராஜீவ் சுக்லா, திபேந்தர் ஹூடா, அகில இந்திய மஜ்லீஸ் கட்சித் தலைவர் அசாதுதீன் ஒவைசி, பாஜகவின் அபரஜித்தா சாரங்கி, அருண் கோயல் உள்ளிட்டோர் பங்கேற்றனர்.