அமெரிக்க துணை அதிபர் இன்று இந்தியா வருகை

பிரதமர் மோடியுடன் பேச்சு

- 

புது தில்லி, ஏப். 20: அமெரிக்க துணை அதிபர் ஜே.டி.வான்ஸ், நான்கு நாட்கள் பயணமாக இந்தியாவுக்கு திங்கள்கிழமை (ஏப். 21) வருகை தருகிறார். அவருடன், இந்திய வம்சாவளியைச் சேர்ந்த அவரின் மனைவி உஷா மற்றும் மூன்று குழந்தைகளும் வருகிறார்கள்.

தில்லியில் பிரதமர் நரேந்திர மோடியை திங்கள்கிழமை மாலை சந்திக்கும் ஜே.டி.வான்ஸ், இருதரப்பு வர்த்தகம், வரி, பிராந்திய பாதுகாப்பு தொடர்புடைய முக்கிய விவகாரங்கள் மற்றும் ஒட்டுமொத்த ஒத்துழைப்பை விரிவுபடுத்துவதற்கான வழிமுறைகள் குறித்து பேச்சுவார்த்தை நடத்தவுள்ளார். இதைத் தொடர்ந்து, ஜே.டி.வான்ஸ், உஷா ஆகியோருக்கு பிரதமர் இரவு விருந்து அளிக்கவுள்ளார்.

இந்தியா உள்ளிட்ட நாடுகளில் இருந்து இறக்குமதி செய்யப்படும் பொருள்கள் மீது அண்மையில் பரஸ்பர வரி விதிப்பை மேற்கொண்ட அமெரிக்க அதிபர் டொனால்ட் டிரம்ப், பின்னர் அதை நிறுத்திவைத்தார்.