பாஜக அமளியால் மாநிலங்களவை ஒத்திவைப்பு

அரசு ஒப்பந்தங்களில் முஸ்லிம்களுக்கு 4 சதவீதம் இடஒதுக்கீடு அளிக்கும் கர்நாடக அரசின் முடிவுக்கு எதிர்ப்பு தெரிவித்து பாஜக கடும் அமளியில் ஈடுபட்டதால் மாநிலங்களவை திங்கள்கிழமை நாள் முழுவதும் ஒத்திவைக்கப்பட்டது.

- 

புது தில்லி, மார்ச் 24:

மக்களவையிலும் பாஜக எம்.பி.க்கள் இந்தப் பிரச்னையை எழுப்பியதால், அவை நடவடிக்கைகள் அவ்வப்போது முடங்கின.

கர்நாடகத்தில் அரசு ஒப்பந்தங்களில் முஸ்லிம் ஒப்பந்ததாரர்களுக்கு 4 சதவீத இடஒதுக்கீடு வழங்கும் சட்டத்திருத்தத்துக்கு அந்த மாநிலத்தில் ஆளும் காங்கிரஸ் அரசு அண்மையில் ஒப்புதல் அளித்தது.

கர்நாடக அரசின் இந்த முடிவைத் தொடர்ந்து முஸ்லிம்களுக்கு இடஒதுக்கீடு வழங்கும் வகையில் அரசமைப்புச் சட்டத்தில் திருத்தம் செய்யப்பட வேண்டும் என்று அந்த மாநில துணை முதல்வர் டி.கே.சிவகுமார் பேசியதாகக் கூறப்பட்டது சர்ச்சையை ஏற்படுத்தியது.

அதேநேரம், இத்தகைய கருத்தைத் தான் தெரிவிக்கவில்லை என்று டி.கே. சிவகுமார் மறுத்துள்ளார்.