இரு நாடுகளுக்கும் இழப்பு!

ஹெச்-1பி விசா மீது அமெரிக்க அதிபர் டொனால்ட் டிரம்ப் விதித்துள்ள புதிய உத்தரவின்படி, ஒவ்வொரு புதிய விண்ணப்பதாரரும் அமெரிக்க அரசுக்கு ஒரு லட்சம் டாலர் (இந்திய மதிப்பில் சுமார் ரூ.88 லட்சம் ரூபாய்) செலுத்த வேண்டி உள்ளது. இது ஜனநாயக நாட்டில் மக்களால் தேர்ந்தெடுக்கப்பட்ட அமெரிக்க அதிபர், இன்னொரு ஜனநாயக நாடான இந்தியாவை நசுக்குகிற முயற்சியாகும்.

- முனைவர் வைகைச்செல்வன்

அமெரிக்காவின் வளர்ச்சிக்கு இந்தியர்களின் பங்கு அளப்பரியது. அமெரிக்காவில் வசிக்கும் இந்திய வம்சாவளியினர் எண்ணிக்கை சுமார் 50 லட்சமாகும். இந்திய வம்சாவளியினர் அமெரிக்காவின் மக்கள்தொகையில் சுமார் 1.5% மட்டுமே இருந்தபோதிலும், அந்த நாட்டின் வளர்ச்சிக்காக தொழில்நுட்பம், தொழில் முனைவு மற்றும் அறிவியல் துறைகளில் கணிசமான பங்களிப்பை வழங்கியிருக்கிறார்கள். குறிப்பாக, பல இந்திய அமெரிக்கர்கள் 'ஸ்டார்ட்-அப்' நிறுவனங்களில் யூனிகான்களை உருவாக்குவதிலும், தொழில்நுட்பத் துறையில் புதிய கண்டுபிடிப்புகளை உருவாக்குவதிலும் முக்கியப் பங்காற்றியிருக்கின்றனர்.

தொழில்நுட்பத் துறையில் பல அமெரிக்க தொழில்நுட்ப நிறுவனங்கள், இந்திய வம்சாவளியினரின் தலைமுறையின் கீழ் வெற்றிகரமாக இயங்கி வருகின்றன. 'சிலிகான் வேலி' போன்ற பகுதிகளில் புதிய வணிகங்களை ஏற்படுத்துவதிலும் இந்தியர்களின் பங்கு அளப்பரியது. அறிவியல், ஆராய்ச்சி மற்றும் உயர் கல்வித் துறைகளில் இந்தியர்களின் பங்களிப்பு குறிப்பிடத்தக்கது. பல இந்திய அமெரிக்கர்கள் அமெரிக்கப் பொருளாதாரத்துக்கு, குறிப்பாக துணிச்சலான மூலதனம் மற்றும் புதுமைகளை உருவாக்குவதன் மூலம் வலுச் சேர்க்கின்றனர்.

இந்த நிலையில், ஹெச்-1பி விசா கட்டண உயர்வு இந்தியர்களுக்கும், இந்தியாவுக்கும் இழைக்கப்படுகிற மிகப் பெரிய துரோகமாகும். டிரம்ப்பின் இந்த உத்தரவு அமெரிக்காவில் பணியாற்ற வேண்டும் என்ற கனவோடு இருக்கிற இந்தியர்களுக்கு நேரடியான தாக்கத்தை ஏற்படுத்தும்.

செப்டம்பர் 21 முதல் அமலுக்கு வந்த இந்த ஹெச்-1பி விசா கட்டண உயர்வு குறித்து அமெரிக்க வெள்ளை மாளிகை, 'புதிதாக விண்ணப்பிப்பவர்களுக்கு இது ஒரு முறை தானே தவிர, ஆண்டுதோறும் அல்ல' என்று விளக்கம் அளித்துள்ளது. ஏற்கெனவே, ஹெச்1-பிவிசாவை வைத்திருந்து தற்போது அமெரிக்காவுக்கு வெளியில் இருப்பவர்கள், நாடு திரும்பும் போது ஒரு லட்சம் டாலர் திரும்பச் செலுத்த வேண்டியதில்லை என்றும் தெரிவித்துள்ளது.