தமிழகத்தில் கோடை மழை 97% அதிகம்: வானிலை ஆய்வு மைய தென்மண்டல தலைவர்

தமிழகத்தில் நிகழாண்டில் கோடை மழை இயல்பைவிட 97 சதவீதம் அதிகமாக பெய்துள்ளதாகவும், இதில் சென்னையில் 129 சதவீதம் அதிக மழை பெய்துள்ளதாகவும் வானிலை ஆய்வு மைய தென்மண்டல தலைவர் பி. அ முதா தெரிவித்தார்.

- 

சென்னை, மே 31:

இது குறித்து சென்னையில் அவர் செய்தியாளர்களிடம் சனிக்கிழமை கூறியதாவது:

தமிழகத்தில் மார்ச் முதல் மே மாதம் வரை இயல்பாக 130 மி.மீ. கோடை மழை பெய்ய வேண்டிய நிலையில், நிகழாண்டில் 250 மி.மீ.மழை பெய்துள்ளது. இது இயல்பைவிட 97 சதவீதம் அதிகமாகும். 31 மாவட்டங்களில் இயல்பைவிட மிக அதிகமாகவும், 9 மாவட்டங்களில் இயல்பைவிட அதிகமாகவும் பெய்துள்ளது.

வெப்பநிலை: நிகழாண்டு கோடையில் வேலூர் மாவட்டத்தில் 16 நாள்களுக்கும், பரமத்தி வேலூரில் 10 நாள்களுக்கும் வெப்பநிலை 104 டிகிரி பாரன்ஹீட்டுக்கும் அதிகமாக பதிவானது. அதேபோல், நிகழாண்டில் அதிகபட்சமாக ஈரோட்டில் கடந்த மே 15- இல் 106.16 டிகிரி பாரன்ஹீட் வெப்பநிலை பதிவானது.