நடிகர் கமல்ஹாசனுக்கு எதிராக கன்னட அமைப்புகள் போராட்டம்

கன்னடம் குறித்து சர்ச்சை பேச்சு

- 

பெங்களூரு, மே 28: கன்னடம் குறித்து சர்ச்சைக்குரிய வகையில் நடிகர் கமல்ஹாசன் பேசியதை கண்டித்து கர்நாடகத்தின் பல்வேறு பகுதிகளில் கன்னட அமைப்பினர் போராட்டத்தில் ஈடுபட்டனர்.

ராஜ்கமல் பிலிம்ஸ் இன்டர்நேஷனல் தயாரிப்பில் மணி ரத்னம் இயக்கத்தில் நடிகர்கள் கமல்ஹாசன், சிலம்பரசன், நாசர், நடிகைகள் திரிஷா, அபிராமி உள்ளிட்டோர் நடித்த 'தக் லைஃப்' என்ற திரைப்படம் ஜூன் 5 ஆம் தேதி உலகம் முழுவதும் திரையிடப்படுகிறது.

இந்த நிலையில் சென்னையில் மே 24 ஆம் தேதி நடந்த படத்தின் ஒலிப்பேழை வெளியீட்டு விழாவில் கலந்துகொண்ட கன்னட நடிகர் சிவராஜ்குமாரை பாராட்டும் வகையில் பேசிய கமல்ஹாசன், 'தமிழில் இருந்து பிறந்ததுதான் கன்னடம்' என்று கூறியிருந்தார். இது, கர்நாடகத்தில் பெரும் சர்ச்சைக்கு வித்திட்டுள்ளது.

நடிகர் கமல்ஹாசனின் கருத்தை கண்டித்து பெங்களூரு, ஹாசன், மைசூரு, பெலகாவி, ஹுப்பள்ளி உள்ளிட்ட கர்நாடகத்தின் பல்வேறு பகுதிகளில் கர்நாடக ரக்ஷணவேதிகே (பிரவீண் ஷெட்டி பிரிவு) அமைப்பினர் புதன்கிழமை போராட்டம் நடத்தினர்.

மேலும், நடிகர் கமல்ஹாசன் நடித்துள்ள 'தக் லைஃப்' திரைப்படத்தை கர்நாடகத்தில் வெளியிட தடைவிதிக்க வேண்டும் என்று கர்நாடக திரைப்பட வர்த்தகசபையிடம் அவர்கள் மனு அளித்தனர்.

அதேபோல நடிகர் கமல்ஹாசனின் கருத்துக்கு பல்வேறு கன்னட அமைப்புகள் கண்டனம் தெரிவித்துள்ளதோடு, தனது பேச்சுக்கு அவர் நிபந்தனையற்ற மன்னிப்பு கேட்க வேண்டும் என்று வலியுறுத்தியுள்ளது.