பஹல்காமில் ஜம்மு-காஷ்மீர் அமைச்சரவைக் கூட்டம்

பாகிஸ்தான் பயங்கரவாதிகளால் கடந்த மாதம் தாக்குதல் நடத்தப்பட்ட ஜம்மு-காஷ்மீரின் பிரபல சுற்றுலா நகரமான பஹல்காமில் அந்த யூனியன் பிரதேச முதல்வர் ஒமர் அப்துல்லா தலைமையில் சிறப்பு அமைச்சரவைக் கூட்டம் செவ்வாய்க்கிழமை நடைபெற்றது.

- 

பஹல்காம், மே 27:

தெற்கு காஷ்மீரின் பஹல்காம் அருகேயுள்ள பைசாரன் பள்ளத்தாக்கில் கடந்த ஏப். 22-ஆம் தேதி சுற்றுலாப் பயணிகள் மீது பாகிஸ்தான் பயங்கரவாதிகள் நடத்திய கொடூர தாக்குதலில் 26 பேர் கொல்லப்பட்டனர். நாடு முழுவதும் அதிர்வலைகளை ஏற்படுத்திய இந்த சம்பவத்தைத் தொடர்ந்து ஜம்மு-காஷ்மீருக்குச் செல்லும் சுற்றுலாப் பயணிகளின் எண்ணிக்கை வெகுவாக குறைந்தது.

கோடைக்கால விடுமுறையாக இருப்பினும் ஜம்மு-காஷ்மீரில், குறிப்பாக காஷ்மீர் பள்ளத்தாக்கில் பெரும்பாலான சுற்றுலாத் தலங்கள் மக்கள் கூட்டமின்றி வெறிச்சோடியுள்ளன. இதனால், சுற்றுலாத் துறையை நம்பியுள்ள அப்பகுதி மக்களின் வாழ்வாதாரம் பாதிக்கப்பட்டுள்ளது.

இந்நிலையில், காஷ்மீருக்கு மீண்டும் சுற்றுலாப் பயணிகளை ஈர்க்கும் நோக்கிலும், இயல்புநிலை திரும்பி வருவதை எடுத்துரைக்கவும் பஹல்காமில் முதல்வர் ஒமர் அப்துல்லா தலைமையில் அமைச்சரவைக் கூட்டம் நடைபெற்றது. தொடர்ந்து, சுற்றுலாத் துறை பிரதிநிதிகளுடன் அவர் கலந்தாலோசனை நடத்தினார்.