மூளை அமீபா பாதிப்பு தொற்றுநோய் அல்ல; பதற்றம் வேண்டாம்

மூளை அமீபா பாதிப்பு தொற்றுநோய் அல்ல; எனவே பதற்றமடைய வேண்டியதில்லை என மக்கள் நல்வாழ்வுத்துறை அமைச்சர் மா.சுப்பிரமணியன் தெரிவித்தார்.

- அமைச்சர் மா.சுப்பிரமணியன்

சென்னை, ஆக. 28:

சுகாதாரமற்ற நீரில் குளிக்கும்போது, 'நிக்லேரியா பவுலேரி' என்ற அமீபா, சுவாசப்பாதை வழியே ஊடுருவி அரிதான மூளைக் காய்ச்சல் நோயான 'பிரீமிரி அமீபிக் மெனிங்கோ என்செபாலிடிஸ்' என்ற பாதிப்பை ஏற்படுத்துகிறது.

இவை, தீவிர காய்ச்சல், அடங்காத தலைவலி, ஆரம்பித்து, கழுத்துப் பகுதி இறுக்கம், குமட்டல், வாந்தி, தலை சுற்றல், வலிப்பு ஏற்படுதல் போன்ற பாதிப்பை ஏற்படுத்துகிறது.

இந்த அமீபா, நரம்புகளின் நியூரான்களைத் தின்று உயிர் வாழும் என்பதால், மூளையையும் சிறுக சிறுக உணவாக உட்கொள்ளும். இதனால், பேதலிப்பு, மூர்ச்சை, கோமா மற்றும் உயிரிழப்பு ஏற்படும். பெரும்பாலும், நோய் பாதித்த ஒரு வாரத்திற்குள் உயிரிழப்பை ஏற்படுத்தும்.