2 ஆண்டுகளில் இந்திய வனப்பகுதி 1,445 சதுர கி.மீ. அதிகரிப்பு

இந்தியாவில் வனம் மற்றும் மரங்களின் பரப்பளவு கடந்த 2021 முதல் 2023-ஆம் ஆண்டு வரை இலான காலகட்டத்தில் 1,445 சதுர கிலோமீட்டர் அதிகரித்துள்ளதாக மத்திய அரசு வெளியிட்ட அறிக்கையில் தகவல் வெளியாகியுள்ளது.

- 

மத்திய அரசின் இந்திய வன ஆய்வு (எஃப்எஸ்ஐ) நிறுவனம் கடந்த 1987-ஆம் ஆண்டு முதல் காடுகளின் பரப்பளவையும், 2001-ஆம் ஆண்டு முதல் மரங்களின் பரப்பளவையும் கணக்கிட்டு வருகிறது. அந்த வகையில், கடந்த சனிக்கிழமை வெளியிடப்பட்ட 2023-ஆம் ஆண்டுக்கான இந்திய வன அறிக்கையின்படி, நாட்டின் மொத்த புவியியல் பரப்பளவில் வனம் மற்றும் மரங்களின் பரப்பு 25.17 சதவீதத்தை எட்டியுள்ளது.

மேலும், 2005-ஆம் ஆண்டிலிருந்து கூடுதலாக 229 கோடி டன் கரியமில வாயு உமிழ்வை உறிஞ்சும் திறனை தேசம் அடைந்துள்ளதும் தெரியவந்தது.

பாரீஸ் ஒப்பந்த இலக்குகளை அடைவதற்கான பருவநிலை திட்டங்களின் ஒரு பகுதியாக, 2030-ஆம் ஆண்டுக்குள் வனப்பரப்பு விரிவாக்கம் மூலம் கூடுதல் 250 முதல் 300 கோடி டன் கரியமில வாயு உமிழ்வை உறிஞ்சும் திறனை அடைய நாடு உறுதியளித்துள்ளது குறிப்பிடத்தக்கது.