உத்தரகண்ட்: பேருந்து விபத்தில் 36 பேர் உயிரிழப்பு

உத்தரகண்ட் மாநிலம் அல்மோரா மாவட்டத்தில், தனியார் பேருந்து பள்ளத்தாக்கில் கவிழ்ந்து திங்கள்கிழமை விபத்துக்குள்ளானது; இதில் 10 பெண்கள் உள்பட 36 பேர் உயிரிழந்தனர்; 26 பேர் காயமடைந்தனர்.

- 

தீபாவளி பண்டிகை முடிந்து பணிக்குத் திரும்புவதற்காக பேருந்தில் அதிக பயணிகள் ஏறியதால் ஏற்பட்ட சுமையே விபத்துக்குக் காரணம் என அந்த மாவட்ட அதிகாரிகள் தெரிவித்தனர்.

விபத்தில் உயிரிழந்தவர்களின் குடும்பங்களுக்கு குடியரசுத் தலைவர் திரௌபதி முர்மு, பிரதமர் மோடி, உள்துறை அமைச்சர் அமித்ஷா, எதிர்க்கட்சித் தலைவர் ராகுல் காந்தி உள்ளிட்டோர் இரங்கல் தெரிவித்தனர்.

இந்த விபத்து குறித்து அல்மோரா மாவட்ட ஆட்சியர் ஆலோக் குமார் பாண்டே கூறியதாவது: கத்வால் மோட்டார் நிறுவனத்தால் இயக்கப்படும் தனியார் பேருந்து கத்வால் பிராந்தியத்தில் உள்ள பௌடியிலிருந்து 250 கி.மீ. தொலைவில் உள்ள குமாவுன் பகுதியில் ராம்நகருக்கு ஞாயிற்றுக்கிழமை இரவு புறப்பட்டது. 43 இருக்கையுள்ள இந்தப் பேருந்தில் 60-க்கும் மேற்பட்டோர் பயணித்தனர்.