ரூ.1 கோடி போதை மாத்திரை பறிமுதல்

மும்பையில் இருந்து ரயில் மூலம் சென்னைக்கு ரூ.1 கோடி மதிப்பிலான போதை மாத்திரை கடத்தி வந்த 5 பேரை போலீசார் கைது செய்தனர்.

- 

ராணிப்பேட்டை மாவட்டம், அரக்கோணம் ரயில் நிலையம் வழியாக மும்பையில் இருந்து சென்னை செல்லும் அதிவிரைவு எக்ஸ்பிரஸ் ரயிலில் போதை மாத்திரைகளை கடத்தி செல்வதாக புகார்கள் எழுந்தது. இதையடுத்து, அரக்கோணம் டிஎஸ்பி ஜாபர் சித்திக் மேற்பார்வையில் மதுவிலக்கு பிரிவு போலீஸ் இன்ஸ்பெக்டர் சந்திரகுமார் தலைமையில் போலீசார் அடிக்கடி அரக்கோணம் ரயில் நிலையம் மற்றும் ரயில்களில் சோதனை நடத்தி வந்தனர்.

இந்நிலையில், மும்பையில் இருந்து சென்னைக்கு போதை மாத்திரை கடத்தியது தொடர்பாக, சமீபத்தில் 2 பேரை போலீசார் கைது செய்து அவர்களிடம் இருந்து போதை மாத்திரைகளை பறிமுதல் செய்து, சிறையில் அடைத்தனர். முன்னதாக, அவர்களிடம் நடத்திய விசாரணையின் போது மும்பையில் ஒரு மருந்து கடையில் போதை மாத்திரைகளை குறைந்த விலைக்கு வாங்கி வந்து, சென்னை உள்ளிட்ட பல்வேறு பகுதிகளில் அதிக விலைக்கு விற்பனை செய்வது தெரிய வந்தது.