ஏஐ தாக்க மாநாட்டில் கடும் சர்ச்சை சீன ரோபோ நாயை காட்சிக்கு வைத்த உபி பல்கலைக்கழகம்

அரங்கிலிருந்து உடனடியாக வெளியேற உத்தரவு; கண்காட்சிக்கு இன்று பொதுமக்கள் வர திடீர் தடை

- 

டெல்லியில் நடந்து வரும் ஏஐ தாக்க கண்காட்சியில் உபியை சேர்ந்த கல்கோடியாஸ் பல்கலைக்கழகம் சீன ரோபோ நாயை காட்சிக்கு வைத்த விவகாரம் பெரும் சர்ச்சையை கிளப்பியது. உடனடியாக அப்பல்கலைக்கழகம் அரங்கிலிருந்து வெளியேற உத்தரவிடப்பட்டுள்ளது. மேலும், கண்காட்சியில் இன்று ஒருநாள் பொதுமக்கள் பங்கேற்கவும் திடீர் தடை விதிக்கப்பட்டுள்ளது.

செயற்கை நுண்ணறிவு தொழில்நுட்பத்தின் எதிர்காலம் தொடர்பான ஏஐ தாக்க மாநாடும், ஏஐ துறையில் இந்திய மாணவர்கள், ஸ்டார்ட்அப் மற்றும் பன்னாட்டு நிறுவனங்களின் புதுமை கண்டுபிடிப்புகள் தொடர்பான ஏஐ தாக்க கண்காட்சியும் டெல்லி பாரத் மண்டபத்தில் நடந்து வருகிறது. ஏஐ தாக்க கண்காட்சியை பிரதமர் மோடி கடந்த 16ம் தேதி தொடங்கி வைத்தார். வரும் 20ம் தேதி வரை நடக்கும் இந்த கண்காட்சியில், 300க்கும் மேற்பட்ட அரங்குகள் அமைக்கப்பட்டு ஏஐயின் புதுமை கண்டுபிடிப்புகள் காட்சிக்கு வைக்கப்பட்டுள்ளன.