CERA nipasidaan sa kritikal nga suplay sa kuryente sa 2026

Niluwat og seryoso'ng pasidaan ang Cebu Electricity Rights Advocates (CERA) nga ang Cebu masulod sa kritikal nga sitwasyon sa suplay sa kuryente sa tuig 2026 ug posibleng makapaluya kini sa lokal nga ekonomiya ug makompromiso ang kaluwasan sa publiko ilabi na sa proteksiyon batok sa sunog.

- 

Si Nathaniel Chua, CERA convenor nagkanayon nga ang maong pasidaan giluwat human nga ang Department of Energy (DOE) opisyal nga ni-flag sa usa ka potential critical supply situation alang sa Visayas sa 2026 tungod sa paspas nga pagsaka sa demand ug kakulang sa bag-ong power generation.

Matud sa CERA nga nagsaka ang demand sa kuryente sa Cebu ngadto sa 150 megawatts (MW) matag tuig diin nilabaw kini sa lokal nga kapasidad sa produksiyon sa kuryente sa isla.

Ug tungod niini napugos ang Cebu nga magsalig sa imported nga kuryente nga gi-transmit pinaagi sa submarine cables gikan sa ubang mga isla diin matud sa grupo nga delikado kini ug dili molungtad.

Gipadayag ni Chua nga ang mga lider sa negosyo ilabi na sa manufacturing ug export sectors nipadayag og kabalaka sa sitwasyon.