సినిమా రివ్యూ

ఈసినిమా దర్శక నిర్మాతలు ఇప్పటికే పలు ఇంటర్వూలు కూడా ఇచ్చారు. మొత్తంగా నిజాం పాలనా కాలంలో హిందువులపై ముస్లిం పోలీసులు, ఖాసీం రజ్వీ నాయకత్వంలో కిరాయి 'రాజాకార్' సాయుధ సైనిక దళం అనేక దుర్మార్గాలను చేసింది.

- -డాక్టర్. కోలాహలం రామ్ కిశోర్, 9849328496.

మార్చినెల శుక్రవారం 15వ తేదీన "రజాకార్" సినిమా విడుదలైంది. ఈ సినిమా నిర్మాణం పూర్తి అయి రెండు సంవత్సరాలైంది. ఈసినిమా దర్శక నిర్మాతలు ఇప్పటికే పలు ఇంటర్వూలు కూడా ఇచ్చారు. మొత్తంగా నిజాం పాలనా కాలంలో హిందువులపై ముస్లిం పోలీసులు, ఖాసీం రజ్వీ నాయకత్వంలో కిరాయి 'రాజాకార్' సాయుధ సైనిక దళం అనేక దుర్మార్గాలను చేసింది. అయితే ఇప్పుడు వాటిని తవ్వితీయటంలో ఉద్దేశం అందరికీ తెలిసిందే. ఈ సినిమా ద్వారా రానున్న పార్లమెంటరీ ఎన్నికల ముందు దేశమంతటా వివిధ భాషల్లో విస్తృతంగా ప్రదర్శించి, హిందూ సమాజం ఓటర్లను గంపగుత్తగా సమీకరించి, ముస్లిం పాలకులు, వారి రజాకార్ సైన్యం, దుర్మార్గాలను అతిగా చిత్రీకరణ చేసి చూపించి ముస్లీం ప్రజలంతా దుర్మార్గులే 'అన్న 'నరేటివ్' ను చూపెట్టే ప్రయత్నం చేశారు. గత 75 ఏళ్ళుగా హిందూ, ముస్లింలు అన్నదమ్ముల్లా కలిసిమెలిసి జీవిస్తున్నారు. అప్పుడప్పుడు రాజకీయ నాయకుల మూలంగా ఎన్నికల సమయంలో, పండుగల సందర్భంలో ఇరుపక్షాల మధ్య చెదురుమదురు సంఘటనలు జరిగి ఉ ండవచ్చు. వాటిని భూతద్దంలో చూడకూడదు. ఈ సినిమా 'తెలంగాణ సాయిధ పోరాట 'నేపథ్యంలో వచ్చిన మరో సినిమా, గతంలో నరసింహారావు నిర్మించి, దర్శకత్వం వహించిన 'మాభూమి' బ్లాక్ అండ్ వైట్ సినిమాగా వచ్చింది.ఈ సారి దాదాపు అదే భూమికపై వచ్చిన “రజాకార్" కలర్ లో వచ్చిన సినిమా పాత 'మాభూమి' సినిమాను మరిపిస్తుందని అందరూ ఆశించారు. కానీ ఆ లక్ష్యం నెరవేరలేదు. సినిమాను ఆధునిక సాంకేతిక విలువలతో రూపొందించారు. చిత్రనిర్మాణంలో అధిక ఖర్చులకు వెరవ కుండా భారీగా నిర్మించారు. ఈ సినిమా లక్ష్యం ఏమిటి? అని చూసుకుంటే, "చరిత్రను విస్మరించేవారు చరిత్రను నిర్మించలేరు". అని డాక్టర్ బి.ఆర్ అంబేద్కర్ చెప్పిన మాటలు గుర్తుకు వస్తున్నాయి. గత చరిత్ర ఆధారంగా రూపొందే సినిమాలు, సీరియళ్ళలో కొంత సినిమాటిక్" గా చేర్పులు, మార్పులు కథా, కథనాల్లో ఉండవచ్చు కానీ, పూర్తిగా చరిత్రను వక్రీకరణలు చేయటం, గత చరిత్రను పూర్తిగా విస్మరించే పనిమాత్రం చేయకూడదు.