લેન્સ પડ્યો લવમાં ને ડૉગ્સ બન્યા દિલના હીરો!

જુહુ બીચની રેતીમાં દોડતા-ખેલતા-કૂદતા તો ક્યારેક મૌન નજરે ઘણું બધું કહી દેતા શ્વાન ‘ચિત્રલેખા’ના ચૅરમૅન મૌલિક કોટકના લેન્સમાં કેદ જ નથી થયા, પણ એમની અંદરના પ્રાણીપ્રેમને જીવંત કર્યો છે. કૉફી ટેબલ બુકના આ ડૉગ્સ હવે માત્ર બીચ પરનાં પ્રાણી નથી રહ્યાં... એ તો લોકોનાં હૃદયના સાચા હીરો બની ગયા છે.

- કેતન મિસ્ત્રી (મુંબઈ)

પેટ્સ ઑન જુહુ બીચ પુસ્તકનું લોકાર્પણ...

મુંબઈના વર્લ્ડ ફેમસ જુહુ બીચ પર દરરોજ પરોઢિયે સૂરજ પહેલાં એક સ્મિત ઊગતું. એ સ્થિત કાલુનું, એટલે કે રખડુ કૂતરા કાળિયાનું. વહેલી સવારે દરિયાકિનારે જેવાં કોઈનાં પગલાં રેતી પર પડે એટલે મું તનેનિકનો કાલુ દોડી આવે. આગંતુકને આવકારવા આનંદથી પૂંછડી એવી પટપટાવે, જાણે સમુદ્રનાં મોજાં એની અંદર જ વસે.

પણ એક સવારે કાલુ ન આવ્યો. જુહુ બીચના રેગ્યુલરો આવી જશે પાછો રખડતો એમ કહીને ભૂલી ગયા, પણ દરિયાકાંઠે સવાર પડતી રહી-કાળિયાના સ્મિત વગર એટલે કાલુની શોધ ચાલી. એની તસવીર મુંબઈભરના ડૉગ (વ્હૉટ્સઍપ) ગ્રુપમાં વાઈરલ કરવામાં આવી, પોલીસફરિયાદ નોંધાવવામાં આવી. અચાનક સોળમા દિવસે કાલુ મળી ગયો. હેમખેમ. બે ટપોરીબાજોએ કાલુને કિડનૅપ કર્યો હતો! પોલીસે એમને પકડી લીધા.

આ આખી ઘટનામાં કાલુની તસવીરે ચમત્કાર કર્યો હતોઃ એક ક્લિક અને એક અબોલ જીવ પાછો મળી ગયો.

અને એ તસવીર લીધી હતી મૌલિક કોટકે.

ગયા રવિવાર–૧૨ એપ્રિલે, નૅશનલ પેટ્સ ડેની વળતી સવારે સદા અગ્રસર સાપ્તાહિક ચિત્રલેખા ગ્રુપના ચૅરમૅન, અવ્વલ દરજ્જાના લેન્સમૅન મૌલિક કોટકના તસવીર-સંગ્રહ પેટ્સ ઑન જુહુ બીચના લોકાર્પણ અવસરે સુખ્યાત ટેલિવિઝન પ્રોડ્યુસર પ્રીતિ સિમોસે કિડનૅપિંગ ઑફ કાલુની સત્ય કથા વર્ણવી.

જુહુ બીચથી માંડ ચારેક કિલોમીટર દૂર આવેલી ધ ક્લબમાં આયોજિત આ દબદબાભર્યા સમારંભના વિશેષ અતિથિ હતાઃ ઈન્વેસ્ટમેન્ટ બૅન્કર-વેન્ચર કૅપિટલિસ્ટ વલ્લભ ભણસાલી, જાણીતા કાર્ડિયાક સર્જ્યન તથા એશિયન હાર્ટ ઈન્સ્ટિટ્યૂટના સ્થાપક ડૉ. રમાકાંત પાંડા ડૉ. રમાકાંત પાંડા તથા એક-એકથી ચડિયાતી ટીવીસિરિયલ, ફિલ્મ, વેબ-સિરીઝના નિર્માતા-લેખક-દિગ્દર્શક વિપુલ અમૃતલાલ શાહ.