બાળઉછેરની જ્વાબદારી માત્ર સ્ત્રીની નહીં, આખા પરિવારની છે!

પોતે જેને જન્મ આપ્યો એ શિશુનો જાન લેવાની હદ સુધી માતા પહોંચે એની પાછળ કારણો શું હોઈ શકે?

- ડૉ. મિતાલી સમોવા

એક સ્વસ્થ સમાજ બનાવવા માટે સ્વસ્થ બાળકોનો ઉછેર થવો જરૂરી છે. સ્વસ્થ બાળકોના ઉછેર માટે માતા સ્વસ્થ હોવી જરૂરી છે. જો કે માતા સ્વસ્થ રહે એ માટે પિતા તથા અન્ય પરિવારજનો સહયોગી હોય એ ખૂબ જરૂરી છે. ફક્ત સંયુક્ત પરિવારમાં સાથે રહેવું નહીં, પરંતુ ખરેખર માતાના જીવનને આસાન બનાવે એ પ્રમાણે બાળકની અને પારિવારિક જવાબદારી પણ વહેંચવામાં આવે અને માતાના શારીરિક-માનસિક સતત થતા અનિચ્છનીય બદલાવ દરમિયાન માતાને સમજદારી સાથે ટેકો પૂરો પાડવામાં આવે એ જરૂરી છે.

હમણાં એક યુવા માતાએ પોતાનું એક અઠવાડિયાનું બાળક રડતું બંધ નહોતું થતું તો એને ફ્રીઝરમાં મૂકી દીધું અને પોતે શાંતિથી સૂઈ ગઈ. બાળકના રડવાનો અવાજ સાંભળીને સાસુ આવ્યાં અને બાળકને બચાવી લીધું. આ ઘટનાએ સોશિયલ મિડિયા પર ભારે નેગેટિવ વાતાવરણ ઊભું કર્યું અને મૉડર્ન જમાનાની યુવતીઓ માતૃત્વને લાયક નથી એવી વાતો થવા લાગી. જો કે આ કંઈ પહેલો કિસ્સો નથી. અગાઉ આ જ રીતે કેરળમાં એક યુવતીએ એના બાળકને તકિયાથી દબાવીને મારી નાખ્યું હતું. તો ઔર એક સ્ત્રીએ પોતાના બાળકને નવમા માળેથી નીચે ફેંકી દીધું હતું. અન્ય એક માતાએ છ મહિનાના બાળકને અવનમાં મૂકીને ભૂંજી નાખ્યું હતું. પ્રેમી સાથે મળીને અથવા પ્રેમી સાથે પકડાઈ જવાને કારણે બાળકને મારી નાખતી સ્ત્રીઓના આંકડા પણ મળી રહેશે.