સ્ત્રીને માણસ તરીકેની માન્યતા ક્યારે મળશે?

જડસુ તાલિબાની શાસકોની તો વાત જ જવા દો, પણ બીજે પણ મહિલાઓના હાલ બહુ સારા તો નથી જ.

- ડૉ. મિતાલી સમોવા

ઈતિહાસમાં કોઈ આખેઆખા સમુદાયને નિર્જીવ કે ગુલામકક્ષાએ કેવી રીતે રાખી શકાય એનો અભ્યાસ કરવો હોય તો અફઘાનિસ્તાન એનું શ્રેષ્ઠ ઉદાહરણ છે! કોઈ પણ સમુદાય, જાતિ કે લિંગની વ્યક્તિને કોઈ બીજા સમુદાય કે લિંગની વ્યક્તિ દ્વારા તદ્દન અમાનવીય કક્ષાએ શોષણ-અત્યાચારનો ભોગ બનાવવી એ કેટલો મોટો ગુનો છે એ આજે પણ ઘણા લોકોને સમજાતું નથી. સેંકડો વર્ષોથી શોષિત-પીડિત સમુદાયોને થોડા સમયથી જ મળેલા થોડા સમયના અધિકારો પાછા છીનવી લેવા આ લોકો રીતસર આંદોલન ચલાવે છે, પરંતુ પીડિતોને આ પરિસ્થિતિમાં લાવનારી સામાજિક, ધાર્મિક કે રાજકીય વ્યવસ્થાનો વાંક એ લોકો સમજતા કે સ્વીકારતા નથી.