એક શિક્ષકની બદલીએ ગામને હિબકે ચડાવ્યું!

ઘોડે બેસાડી રાઘવ કટકિયાને વિદાય આપનારા મિતિયાળાવાસીઓ ધ્રૂસકે ધ્રૂસકે રડ્યા.

- દેવેન્દ્ર જાની (રાજકોટ) । અરવિંદ ગોંડલિયા (સુરત)

કોઈ પૂછે કે એક શિક્ષક શું કમાય છે?

આ સવાલનો જવાબ સૌરાષ્ટ્રના એક ગામના શિક્ષકે એવો આપ્યો છે કે પૂછનારા દંગ થઈ જાય. જો કે એમણે જવાબ શબ્દોથી નહીં, એમના કામથી આપ્યો છે.

એક શિક્ષકની નોકરી કરીને પંદર-વીસપચ્ચીસ કે પચાસ હજાર રૂપિયાનો પગાર મેળવનારા તો ઘણા હશે, પરંતુ અહીં જેની વાત છે એ શિક્ષકે માત્ર શાળાના વિદ્યાર્થીઓની જ નહીં, આખા ગામના લોકોની દિલથી લાગણી જીતી છે, જેનું રૂપિયામાં મૂલ્ય આંકી શકાય એમ નથી.

ઘોડે બેસાડી રાઘવ કટકિયાને વિદાય આપનામિતિયાળાવાસીઓ ધ્રૂસકે ધ્રૂસકે રડ્યા.

લાખો રૂપિયાનો પગારદાર હોય, પણ એવા કોઈ અમલદારની બદલી થાય તો કોઈ નોંધ પણ લેતું નથી. અહીં વાત છે અમરેલીના જાફરાબાદ તાલુકાના મિતિયાળા ગામના શિક્ષક રાઘવ કટકિયાની, જે બાળકોને ભણાવવાની પોતાની અનોખી શૈલીને કારણે રઘુ રમકડું એ નામે જાણીતા છે. બાળક સાથે બાળક જેવા બનીને એ ગમ્મત સાથે જ્ઞાન આપતા હોવાથી ભારે લોકપ્રિય બન્યા છે. પ્યારથી બાળકો અને વાલીઓનાં દિલ જીતનારા આ શિક્ષકની હમણાં બદલી થઈ તો શાળાનાં બાળકો જ નહીં, ગામવાસીઓ પણ આંસુ રોકી શક્યાં નહીં.