નોકરિયાત સ્ત્રી માટે લગ્ન કે બાળક મેં ગુનો છે?

પરિવાર અને વંશવેલો આગળ વધારવાની ‘જવાબદારી’ જેના માથે છે એ મહિલાના હાથ બાંધી દેવામાં આવે ત્યારે...

- ડૉ. મિતાલી સમોવા

સોનાનાં ઈંડાં આપતી મરઘી જોઈતી બધાને હોય છે, બધા જ એને જોઈને અહોભાવથી આશ્ચર્યચકિત થઈ જતા હોય છે, એની આ માયાવી અને ચમત્કારી શક્તિથી સૌને લાભ મેળવવાની ઈચ્છા હોય છે અને સૌકોઈને સોનાનાં ઈંડાં મેળવીને માલામાલ થઈ જવું હોય છે. ઘણા ધીરજવાન અને સમજદાર માણસ એને ચારો ખવડાવીને તાજીમાજી રાખતા હોય છે અને એના થકી પોતે પણ સમૃદ્ધ બનતા હોય છે, જ્યારે ઘણા મૂરખા એવા હોય છે કે જેમને સોનાનાં ઈંડાં આપતી મરઘીની અસલ કિંમતનો અંદાજો હોતો નથી એટલે એક જ વારમાં વધુ ઈંડાંની લાલચે એની કતલ કરીને પોતાનું પણ ભારે નુકસાન કરી દેતા હોય છે.

જી, તમારો અંદાજો સાચો છે. હું અહીં સ્ત્રી અને એને મળેલા કુદરતી-બાયોલૉજિકલ સુપર પાવર એવા માતૃત્વની જ વાત કરું છે. માતૃત્વ ધારણ કરવું કે નહીં એ પૂર્ણપણે સ્ત્રીની વ્યક્તિગત પસંદગીની બાબત અને એનો અધિકાર છે. જો કે સ્ત્રીને આ સુપર પાવર અને સમાજ-દેશ માટે કરવામાં આવતા ખુદની યુવાની, સુંદરતા અને આરોગ્યનાં બલિદાન બદલ બહિષ્કૃત કરવામાં આવે કે એને આશ્રિત બનાવીને ગુલામીની પરિસ્થિતિમાં મૂકી દેવામાં આવે એ કેવું?