ભારતીય ભોજનનો નિવાર્ય સાથીદાર

કેરીથી માંડી કરમદાનાં અથાણાં બનાવીને આખું વર્ષ સાચવવાં કેવી રીતે?

- વિશ્વા મોડાસિયા

અથાણું એ ભારતીય ભોજનનો આવશ્યક [અને ઘણા લોકો માટે અનિવાર્ય પણ ખરો] એવો હિસ્સો છે. જમવાની થાળીની બાજુમાં રાખવામાં આવતાં વિવિધ પ્રકારનાં અથાણાં ભોજનને વધુ લહેજતદાર અને સ્વાદિષ્ટ બનાવે છે. આથી જ ભારતીય ભોજનમાં અથાણાનું એક અલગ જ મહત્ત્વ છે. ભારતીય ઘરોમાં ગૃહિણી દ્વારા કેરી-ગૂંદાંથી માંડીને જેક ફ્રૂટ (ફણસ) અને મરચાંથી માંડીને લસણ તથા કેરબા-કરમદાં સુધી વિવિધ પ્રકારનાં અથાણાં બનાવવામાં આવે છે, જેનો ખાટો કે મીઠો અને મસાલેદાર સ્વાદ આપણા રોજના, ક્યારેક ન ભાવતા ખોરાકમાં એક ચટકારો ઉમેરે છે.

આપણાં મોટા ભાગનાં ઘરોમાં પ્રાંત અને પસંદગી પ્રમાણે લીલી (કોથમીર-મરચાંની) ચટણી, લીંબુની ચટણી, લસણની ચટણી, વગેરે તો લગભગ બારેમાસ બનતી રહે છે. એ ઉપરાંત, સીઝન પ્રમાણે ભરેલાં મરચાં, ગાજર, કોબી-ભોલર મરચાં, પપૈયાં, કાકડી-ટમેટાં, મૂળા, કાંદા (ડુંગળી), લીલી હળદર જેવાનું અથાણું કે સંભારો પણ ઘણી ગૃહિણી ઘરમાં બનાવે છે.