ગર્ભનાળ સેવાની... ગર્ભનાળ શૈશવની...

માતાએ મુંબઈ-અમદાવાદથી ભાવનગર આવી બાળપ્રવૃત્તિની અહાલેક જગાવી તો દીકરીએ ભાવનગરથી બહાર નીકળી છેક ડેડિયાપાડામાં આદિવાસી બાળકો માટે ધૂણી ધખાવી

કચ્છમાં ભૂકંપ આવ્યો ત્યારે પુનઃ વસનના કામમાં જોડાવા અમે સંસ્થાની ટીમ લઈને ત્યાં પહોંચી ગયાં હતાં. ઈશા ત્યારે હજી તો સાવ નાની. મારી સાડી અને ઓઢણીનો છેડો પકડી બધે જ સાથે ફર્યા કરે. બાળસહજ સવાલ કરે, બીજાં બાળકોને જોઈ સંવેદના અનુભવે. અમારી સાથે જ ટેન્ટમાં રહેવાનું. કુદરતે નુકસાન એટલું વેર્યું હતું કે ક્યારે શું મળશે એ વિશે કશું વિચારવાનું જ નહીં. અમારા દ્વારા પણ પૂરું ધ્યાન ન આપી શકાય, છતાં કોઈ જ ફરિયાદ નહીં અને સૌથી નાના કાર્યકરની જેમ અમારી સાથે ને સાથે જ. હવે એ જાતે ડેડિયાપાડામાં ‘શૈશવ’ને સંભાળી રહી છે અને ‘આરણ્યક’ પ્રોગ્રામ દ્વારા આ વિસ્તારનાં બાળકોની ખેવના કરી રહી છે ત્યારે માતા તરીકે થાય કે નાની દીકરી સાથે જ મોટી થઈ ગઈ...

એક માતા તરીકે પારુલ શેઠ આ શબ્દ ઉચ્ચારે છે ત્યારે એમની આંખોની ચમક ખુશી અને આનંદની આખી વાર્તા કહી જાય છે.

તકવંચિત બાળકોનાં શિક્ષણ, સર્વાંગી વિકાસ અને સ્વાવલંબન માટે કામ કરતી ભાવનગરની શૈશવ સંસ્થા મલ્ટિ-પર્પઝ મોબાઈલ સ્કૂલ, બાલસેના, તરુણસેના, બાળસુરક્ષા સમિતિ જેવી વિશિષ્ટ પ્રવૃત્તિ માટે જાણીતો છે ભાવનગર જિલ્લામાં ચાઈલ્ડ હેલ્પલાઈન ૧૯૦૮ની સેવા પણ આ સંસ્થા સંભાળી રહી છે તો બાળ અધિકાર તાલીમ અને સંશોધન કેન્દ્ર દ્વારા બાળકોના વિકાસ માટે પરિણામલક્ષી પ્રયાસ પણ શૈશવ દ્વારા થઈ રહ્યા છે. ૧૯૯૩થી કાર્યરત એવી આ સંસ્થા બાળકોની સહભાગીતા અને સંવાદિતા સાથે ચાલી રહી છે.

ધારાવી (મુંબઈ), ઝઘડિયા (ભરૂચ) અને અમદાવાદ સહિતનાં સ્થળે વિવિધ સામાજિક સંસ્થા સાથે કામ કરી આખરે ભાવનગરમાં ધૂણી ધખાવનારાં પારુલ અને ફાલ્ગુન શેઠનું શૈશવ એ માનસ સંતાન તો શિચ અને ઈશા એમની દીકરીઓ. મોટી દીકરી શચિ આર્કિટેક્ટ તરીકે પોતાની ઓળખ બનાવી રહી છે તો ઈશા માતાની આંગળી ઝાલી ને શૈશવની સાથી બની છે.

સગવડતાભર્યાં ક્ષેત્રો છોડીને બાળકોની પ્રવૃત્તિમાં આવવાનું મન કેમ થયું?