માત્ર સંપત્તિ નહીં, વારસામાં સંસ્કાર પણ આપી જવા જોઈએ...

જાતમહેનતે એટલે કે આપબળે મોટું વેપાર-ઉદ્યોગ સામ્રાજ્ય ઊભું કરનારા સાહસિકો તથા પિતા કે દાદાના વારસદાર તરીકે અબજોનો કારોબાર મેળવનારા લોકો વચ્ચે શું ફરક હોય?

- જયેશ ચિતલિયા

અબજોપતિ અર્થાત્ બિલિયોનેર શબ્દ હવે એવો કૉમન થતો જાય છે કે ગરીબ માણસ પણ એ સમજી જાય છે. સામાન્ય માનવી અને અબજોપતિ વચ્ચે ફરક હોવો સહજ છે, પણ અબજોપતિની વિવિધ જનરેશન-પેઢીઓ વચ્ચે સુદ્ધાં ફરક હોય છે. આ ફરક વિવિધ બાબતે હોઈ શકે અને હવેના સમયમાં વધતો પણ જાય છે. એ ફરક વિશે હમણાં એક વૈશ્વિક સંસ્થા દ્વારા હાથ ધરવામાં આવેલો અભ્યાસ કેટલાક ચોક્કસ સવાલ ઊભા કરે છે, જેના વિશે સંબંધિત અબજોપતિઓએ પણ વિચારવું રહ્યું. આપણને પણ સામાન્ય માણસ તરીકે આ વિશે વિચારવાથી વધુ સમજ મળી શકે. ભલે આપણે બિલિયોનેર નથી, પરંતુ આ સમજ કેળવવા જેવી ખરી.

સંપત્તિ મળી કે ઊભી કરી?

આ વિષયમાં અચંબો આપનારી પહેલી વાત તો એ છે કે નવી પેઢીના મોટા ભાગના બિલિયોનેર્સ પાસે આજે જે સંપત્તિ-મિલકત છે એ એમની સૂઝ કે ઉદ્યોગ સાહસિકતા મારફત મળવા કરતાં કાનૂની વારસદાર તરીકે તૈયાર છે અર્થાત્ આ સંપત્તિસર્જનને એમની મહેનત, કુશળતા કે સાહસિકતાનું પરિણામ કે સર્જન કહી શકાય નહીં.