આટલો ઉન્માદ... આવી સંગઠનશક્તિ!

વર્ષોથી એક તંબુમાં ઘર બનાવીને રહેતા રાજા રામને કાયમી વસવાટ માટે છેવટે ભવ્ય મંદિર મળ્યું છે.અયોધ્યામાં રામમૂર્તિની પ્રાણપ્રતિષ્ઠાનો મહોત્સવ પાર પડ્યો છે. આ ઘટનાને ઉદાહરણરૂપ ગણી બન્ને-હિંદુ અને મુસ્લિમ સમાજે વધુ વિવાદ ઊભા કર્યા વગર રાષ્ટ્રનિર્માણ માટે આગળ વધવાનું છે.

- હીરેન મહેતા

રામલલ્લાની પ્રાણપ્રતિષ્ઠા સમયે નરેન્દ્ર મોદી: સપનું થયું સાકાર.

આ જે રામ ઘરે આવ્યા છે... અવધ નગરીના નિર્માણાધીન મંદિરમાં રામની મૂર્તિની પ્રાણપ્રતિષ્ઠા પછી વડા પ્રધાન નરેન્દ્ર મોદીએ આ એક વિધાનમાં કરોડો લોકોની શ્રદ્ધાને સધિયારો આપ્યો છે. પ્રચંડ જનઉન્માદ વચ્ચે અયોધ્યામાં રામલલ્લા ફરી બિરાજમાન થયા છે.

મંદિર કે બીજાં ધર્મસ્થળ તો અનેક બને છે, બનતાં રહે છે. અયોધ્યાનું રામમંદિર પણ આમ તો એવું જ એક મંદિર છે. જો કે સદીઓથી અયોધ્યા એ રામનું જન્મસ્થળ ગણાતું હોવાથી આ મંદિરનું મહત્ત્વ બીજાં ધર્મસ્થાનકોના પ્રમાણમાં અનેક ગણું વધારે છે.