રામને હવે તો ઘરમાં બિરાજમાન થવા દો...

બધા વિવાદ હાલપૂરતા કોરાણે મૂકી સમય છે અયોધ્યામાં રામમૂર્તિની પ્રાણપ્રતિષ્ઠાનો મહોત્સવ નિર્વિઘ્ને પાર પાડવાનો. માનીએ કે ન માનીએ, આ સવાલ કરોડો દેશવાસીઓની આસ્થાનો છે.

- હીરેન મહેતા

સારા કામમાં સો વિઘ્ન આવે. અયોધ્યામાં નિર્માણાધીન મંદિરમાં રામલલ્લાની મૂર્તિની પ્રાણપ્રતિષ્ઠાનું મુહૂર્ત નજીક આવી રહ્યું છે એમ આ પ્રસંગ સાથે કોઈ ને કોઈ નવા વિવાદ ઊછળતા રહે છે. ૧૪ વર્ષના વનવાસ અને લંકાવિજય પછી અયોધ્યા પાછા ફરેલા રામના જીવનમાં એક ધોબીના શબ્દોએ ઉત્પાત મચાવ્યો એવો ઉત્પાત અત્યારે પણ ઊભો કરવાના પ્રયાસ થઈ રહ્યા છે.

પ્રાણપ્રતિષ્ઠા મહોત્સવના આમંત્રણથી માંડી એના ચોક્કસ સમય સુધીના અનેક મુદ્દે વિવાદ ચાલે છે. મંદિર હજી પૂરું બન્યું નથી એટલે એમાં મૂર્તિની સ્થાપના ન કરી શકાય એવો મત વ્યક્ત કરી શંકરાચાર્ય સહિતના સનાતન ધર્મના કેટલાક સંતોએ પ્રાણપ્રતિષ્ઠા મહોત્સવ સામે વાંધો લીધો છે. અમુક ધર્મનેતાઓને લાગે છે કે ભારતીય જનતા પક્ષ આ મહોત્સવને એક રાજકીય ઘટના બનાવી એનો લાભ લઈ રહ્યો છે. એક સનાતની આગેવાને વળી રામમૂર્તિની પ્રાણપ્રતિષ્ઠા કરતાં અગાઉ ગૌહત્યા રાવ શરત તો કોંગ્રેસ અને બીજા ભાજપવિરોધી પક્ષોએ વડા પ્રધાન નરેન્દ્ર મોદી સામેનો રોષ વ્યક્ત કરવા પ્રાણપ્રતિષ્ઠા મહોત્સવનો અપ્રગટ બહિષ્કાર કર્યો છે. રામ માટે શાંતિ એ સમયે પણ નહોતી અને અત્યારે, આટલાં વર્ષે રામલલ્લા ફરી એમના ઘરમાં ગોઠવાઈ રહ્યા છે ત્યારેય નથી.

આપણો સમાજ અત્યારે એટલો વિભાજિત છે કે એમાં રાજકારણ ઘૂસવાનું જ છે, પણ આપણી માનસિકતા હવે એવી થઈ ગઈ છે કે આપણે ધાર્મિક પ્રસંગોની ઉજવણીમાં પણ એને માનભર્યું સ્થાન આપી દીધું છે. જેની સાથે સમગ્ર હિંદુ સમાજના પુનરોત્થાનને સાંકળી લેવામાં આવે છે એ રામમંદિરનું નવનિર્માણ કે એમાં મૂર્તિની પ્રાણપ્રતિષ્ઠા તો સદીઓમાં એકાદ વાર આવતો અવસર છે, પરંતુ એમાંય આપણે આપણા ગજગ્રાહ બાજુએ મૂકી શકતા નથી.