જાતીય સતામણીઃ સ્ત્રીનો ભય સમાજે જ દૂર કરવો પડશે!

જીતના ઉન્માદમાં એક ટીમની એક પ્લેયરને જાહેરમાં કિસ ચોડી દેવાનું સ્પેનના ટબૉલ સંગઠનના વડાને બહુ ભારે પડ્યું. આપણે ત્યાં એક માથાભારે રાજકારણી સામે મહિલા ખેલાડીઓએ હેરાનગતિની ફરિયાદ નોંધાવવા પણ રસ્તે ઊતરવું પડ્યું.

- ડૉ. મિતાલી સમોવા

સ્પેન ફટબૉલ સંગઠનના વડાને કિસની કિક બરાબર વાગી.

આપણે ઘણી વાર ટીવીના પડદે જોઈએ છીએ કે પુરુષ ખેલાડી પર કોઈ મહિલા પ્રશંસક ઓવારી જઈને એને વળગી પડે છે. આવી ઘટના સામાન્ય ગણાય છે એટલે કે કોઈને વાંધાજનક લાગતી નથી. થોડા દિવસ પહેલાં જો કે રમતના મેદાનમાં એવો એક કિસ્સો બન્યો જેનો મોટો વિવાદ જામ્યો અને સેંકડો લોકોએ એ સામે વિરોધ પણ પ્રદર્શિત કર્યો.

ઑસ્ટ્રેલિયામાં યોજાયેલી આંતરરાષ્ટ્રીય મહિલા ફૂટબૉલ ટુર્નામેન્ટમાં સ્પેનની ટીમ જીતી ત્યારે રોમાંચિત થઈ ઊઠેલા સ્પેન ફૂટબૉલ ફેડરેશનના વડા લૂઈ રુબિએલ્સે પોતાની ટીમની જેનિફર હોરમોસો નામની એક ખેલાડીના હોઠ પર કિસ કરી. સ્ટેડિયમમાં ઉપસ્થિત સેંકડો દર્શકો સામે આ ઘટના બની. પેલી પ્લેયર શરમથી પાણી પાણી થઈ ગઈ. જો કે એ સમયે તો એ કંઈ ન બોલી, પરંતુ પછી એણે વિધિવત્ ફરિયાદ નોંધાવી. હવે તો આ ગેરવર્તનના ગુના બદલ લૂઈ રુબિએલ્સને કડક સજા કરવાની માગ ઊઠી રહી છે.