શાળાસંચાલક બન્યા ઈકો-ફ્રેન્ડલી મૂર્તિના ઘડવૈયા

મારી માટી.. મારા ગણેશઃ 'એથિકલ સ્કૂલ’ના પટાંગણમાં બને છે ગણરાયાની મૂર્તિ.

- 

જન્માષ્ટમીના આગલા દિવસે સુરતના પૂણા પાટિયા વિસ્તારમાં આવેલી એથિકલ પબ્લિક સ્કૂલના પટાંગણમાં એક બાજુ કૃષ્ણ જન્મોત્સવની તૈયારી થઈ રહી છે તો બીજી બાજુ શાળાનો પાર્કિંગ એરિયા માટીથી મહેકી રહ્યો છે. એક ખૂણામાં કોરી માટીનો ઢગ ખડકવામાં આવ્યો છે. ૫૦ જેટલી બાલદીમાં એ માટી પલાળવામાં આવે છે. મૂર્તિ માટે તૈયાર થયેલી માટીને ગૂંદીને બીબામાં ભરવામાં આવે છે. પાંચેક મિનિટ બાદ એમાંથી બહાર આવે છે ભગવાન શ્રી ગણેશજી. છેલ્લા દોઢ મહિનાથી આ શાળામાં મૂર્તિ બનાવવાની કામગીરી ચાલી રહી છે. લક્ષ્ય ૧૧૧૧ મૂર્તિઓનું છે. એ બનાવવામાં શાળાના અન્ય શિક્ષકો, બસડ્રાઈવર, વૉચમૅન અને વિદ્યાર્થીઓ પણ હોંશભેર જોડાયા છે.