૩૦ સપ્ટેમ્બર યાદ રાખજો, નૉમિની નહીં રાખવામાં નુકસાન તમારું જ છે!

તમારાં બચત-રોકાણનાં નાણાં સ્વજનોને આપી જવાં છે કે સરકારને?

- જયેશ ચિતલિયા

તમારી બચતને રાખો સલામત.

બૅન્ક ડિપોઝિટ, મ્યુચ્યુઅલ ફંડ, શૅર ડિમેટ એકાઉન્ટ, વગેરે બચત-રોકાણનાં સાધનોમાં નૉમિની નીમવાનું ફરજિયાત કરવામાં આવ્યું છે. યાદ રહે, આ નિયમપાલન કરવામાં જ સાર છે, કારણ કે અત્યારે લાખો લોકોનાં નાણાં ‘અનક્લેઈમ્ડ’ તરીકે અટવાયાં છે.

શું તમને ખબર છે કે સરકાર પાસે પ્રજાના, ખાસ કરીને બચતકારો-રોકાણકારોના કેટલા અબજ રૂપિયા અનક્લેઈમ્સ (દાવા વિનાના) પડ્યા છે? આ એવા લોકોનાં નાણાં છે, જેમના અવસાન બાદ એમના રોકાણ વિશે કોઈને જાણ નહોતી અથવા આવી વ્યક્તિઓ પોતાના સ્વજનોને જાણ કર્યા વિના અથવા વસિયત બનાવ્યા વિના વિદાય લઈ ચૂકી છે. એને કારણે એમના ખરા વારસદારોસ્વજનોને પણ એનો લાભ મળ્યો નથી. આ ઉપરાંત, એવા પણ લાખો જીવતા લોકો છે, જેઓ સમયાંતરે પોતાના નિવાસસ્થાન બદલતા રહ્યા અને એમને ડિવિડન્ડના ચેક મળી શક્યા નહીં કે પછી એ લોકો સમયમર્યાદાની અંદર એ ચેક જમા કરાવી શક્યા નહીં. ઘણા વળી બૅન્ક એફડીને ભૂલી ગયા.

આમ લાખો બચતકારો-રોકાણકારો એમનાં નાણાં ચોક્કસ રોક્યા બાદ સાધનો-યોજનાઓમાં અનેકવિધ કારણોસર એને ઉપાડવાનું કે કોઈને નામે કરવાનું ભૂલી કે ચૂકી ગયા.

લાખો લોકોના અબજો રૂપિયા