આશીની ડબલ ટ્રબલ

કામવાળી બાઈ માંદી પડે એમાં તો ઘરમાં શુંનું શું થઈ જાય!

- સુષમા શેઠ

લક્ષ્મી જે બોલી એ સાંભળીને આશીને ( પરસેવો છૂટી ગયો. બે બાજુએથી તકલીફ ઊભી થઈ હતી. ગીતાબહેનના કાકા ગુજરી ગયા હોવાથી એ ખરખરો કરવા દિલ્હી ગયાં અને આ તરફ કામવાળી લક્ષ્મી માંદી પડી. ઘરકામની તેમ જ રસોઈની બેવડી જવાબદારી આશી પર આવી પડી. વળી, પોતાનું બ્યુટી પાર્લર પણ ન છોડાય.

‘રસોઈ હું કરીશ, પણ દરેકે પોતપોતાનાં વાસણ માંજી નાખવાનાં.’ આશીએ એલાન કર્યું, એ સૌએ સહર્ષ વધાવી લીધે જ છૂટકો હતો.

‘એમાં શું? આપણું ઘર તો ગંદું થતું જ નથી. એક દિવસ કચરો વાળવાનો અને બીજા દિવસે ઊભું પોતું ફેરવી દેવાનું.’ ઘરકામ રમતવાત હોય એમ શાંતિભાઈ બોલ્યા. એમણે ચપટી વગાડી, પણ આ વખતે વાગી નહીં.

‘મારે સમયસર સ્ટોર પર પહોંચવાનું હોય.’ મુકેશભાઈએ છટકબારી શોધવા માંડી. એ સાંભળી અમિત બોલ્યો: ‘મારે પણ તો ઑફિસ હોય ને? મોડો પડીશ તો નોકરી જશે.’

‘એમ કરીએ, દરેક પોતપોતાનો રૂમ સાફ કરી લે. બાકીની સફાઈ હું કરી લઈશ. બાપુજી, તમે ચિંતા ન કરતા.’ આશીએ વ્યાવહારિક સૂચન કર્યું.

‘એમ કાંઈ ચાલે? હું મારાથી બનતી બધી મદદ કરીશ.’ ઘરના મોભી શાંતિભાઈ સહાયરૂપ થવાને કાજે બોલ્યા. એ આમેય સવારે વહેલા ઊઠી જતા. આવા કપરા સમયે ઘરકામમાં મદદરૂપ થવાની નૈતિક ફરજ સમજી એમણે દૂધ લઈ ગૅસ પર ગરમ કરવા મૂક્યું, પણ મૂક્યું તે મૂક્યું.

દૂધ ગરમ થાય ત્યાં સુધી છાપામાં નજર ફેરવી લઉં… વિચારી એમણે છાપું હાથમાં લીધું. ત્યાં તો બગાસાં ખાતા મુકેશભાઈ બહાર આવ્યા. ‘શું છે આજના સમાચાર?' પૂછ્યા બાદ છાપામાં વાવાઝોડાના સમાચાર વાંચીને બન્ને કચ્છસૌરાષ્ટ્રની અવદશાની વાતે ચડ્યા એમાં ગૅસ પર મૂકેલા દૂધમાં પણ વાવાઝોડું આવી ગયું. ભારે પવનને લીધે ગુજરાતનાં ઘણાં ગામમાં દરિયાનાં પાણી ઘૂસી ગયાં હતાં એમ અહીં તપેલામાંથી ઊભરાયેલા દૂધની નદીઓ વહેતી થઈ.

‘શેની વાસ આવે છે?’ અમિત બહાર ધસી આવ્યો ત્યારે શાંતિભાઈને ખયાલ આવ્યો કે દૂધ હતું-ન હતું થઈ ગયું.

- હવે કરવું શું, શાંતિલાલ? એમણે આદતવશ જાતને ટપારી.