માનવજુસ્સો એકાએક કડડડભૂસ થાય ત્યારે..

કરિશ્મા તન્ના ‘સ્કૂપ’માં: મુંબઈ શહેરની એક અતિ મહત્ત્વાકાંક્ષી, જુવાન ગુજરાતી ક્રાઈમ રિપોર્ટર, એની વ્યાવસાયિક તેમ જ અંગત દુનિયાનું ચિત્રણ..

- રઘુ જેટલી

સ્ટ્રીમિંગ પ્લૅટફૉર્મ નેટફ્લિક્સ પર આ શુક્રવાર (૨ જૂન)થી સ્કૂપ નામની સિરીઝ આવી છે. સર્જક છેઃ હંસલ મહેતા. આ સિરીઝ મુંબઈનાં ક્રાઈમ રિપોર્ટર જિજ્ઞા વોરાના પુસ્તક બિહાઈન્ડ બાર્સ ઈન ભાયખલાઃ માય ડેઝ ઈન પ્રિઝનથી પ્રેરિત છે. જિલ્લા વોરા પર મુંબઈના વરિષ્ઠ ક્રાઈમ રિપોર્ટર જ્યોતિર્મય ડે (જે ડે)ની હત્યામાં સંડોવણી હોવાનો આરોપ હતો. જિજ્ઞા વોરાની ભૂમિકા ભજવે છે કરિશ્મા તન્ના અને એના પાત્રનું નામ છેઃ જાગૃતિ પાઠક.

હમણાં હમણાંથી ટીવી-ન્યૂઝચૅનલવાળા કાન ફાડી નાખતા સંગીત સાથે અને અમુક ચૅનલ તો કાચ ફૂટ્યાની ઈફેક્ટ સાથે બ્રેકિંગ ન્યૂઝ આપે છે તે થયું સ્કૂપ-એ સમાચાર, જે બીજા કોઈની પાસે નથી. જિજ્ઞા વોરા અંગ્રેજી દૈનિક એશિયન એજમાં મુંબઈ બ્યૂરોમાં ડેપ્યુટી ચીફ હતાં ત્યારે અંધારી આલમની વિવિધ ગુંડાટોળકીઓ, એના સરદારો, વગેરે વિશે સ્કૂપ આપતાં, જે બહુધા પહેલા પાના પર છપાતાં.

૧૧ જૂન, ૨૦૧૧ના રોજ અંગ્રેજી સાંજદૈનિક મિડ ડેના વરિષ્ઠ પત્રકાર પ૬ વર્ષી જ્યોતિર્મય ડે (જે ડે)ની મુંબઈના પવઈ વિસ્તારમાં હત્યા થઈ. હત્યાનું ઈન્વેસ્ટિગેશન ચાલી રહ્યું હોય છે ત્યારે પોલીસને ગૅન્ગસ્ટર છોટા રાજનની ઑડિયો ટેપ મળે છે, જેમાં એ કહે છે કે જે ડેની હત્યા કરવા મને એક મહિલા રિપોર્ટરે ભડકાવ્યો.