વિવાદના વમળ વચ્ચે અટવાતી કેરળકથા..

એક વર્ગ આ ફિલ્મને ઈસ્લામિક કટ્ટરવાદ-ધર્મપરિવર્તનના ખતરનાક ખેલ અને રાજકારણ વચ્ચે અટવાતી ભોળીભટાક હિંદુ યુવતીઓની અવદશાનો ચિતાર ગણાવે છે તો વિરોધીઓ એને જુઠ્ઠી, મારીમચડીને ઊભી કરેલી અને ભડકાવનારી ગણાવી એની પર પ્રતિબંધ ઈચ્છે છે ત્યારે શું કહે છે એના સર્જકો?

- કેતન મિસ્ત્રી (મુંબઈ)

આ શુક્રવારે (પાંચ મેએ) રિલીઝ થનારી ધ કેરલા સ્ટોરીમાં કેરળ રાજ્યમાં ધર્મપરિવર્તન દ્વારા આતંકવાદની આગમાં ધકેલવામાં આવેલી ભોળી યુવતીઓની સત્ય કથાને રજૂ કરવામાં આવી છે. વાર્તાના કેન્દ્રમાં છે કેરળના એક સુખી-સંપન્ન હિંદુ પરિવારની શાલિની ઉન્નીકૃષ્ણન્ (અદા શર્મા). ફિલ્મમાં શાલિનીનો શિવભક્તમાંથી ફાતિમા બનવાનો કષ્ટદાયક પ્રવાસ બતાવવામાં આવ્યો છે. સાથે સાથે કેરળ અને આતંકી સંગઠન આઈએસઆઈએસ (ઈસ્લામિક સ્ટેટ ઑફ ઈરાક ઍન્ડ સિરિયા)ના તાર કેવી રીતે જોડાયેલા છે, રાજ્યના અમુક વિસ્તારને મુસ્લિમ મેજોરિટી સ્ટેટ બનાવવાના મનસૂબા, લવ જિહાદ, વગેરે મુદ્દા આવરી લેવામાં આવ્યા છે. સર્જકોનો દાવો છે કે ધર્માંતરણને લીધે હિંદુ પરિવારનાં સુખ છીનવાઈ જવાની આવી તો હજારો કથા કેરળમાં છે. શાલિનીનું બીજા સમુદાયના લોકોએ ફોસલાવીને ધર્મપરિવર્તન કરાવ્યું, ફાતિમા બનાવી એના નિકાહ કરાવવામાં આવ્યા. આ એક ગ્લોબલ એજન્ડા છે અને ધર્મપરિવર્તન માત્ર હિંદુ યુવતીઓનું જ નહીં, પણ ખ્રિસ્તી યુવતીઓનાં પણ થઈ રહ્યાં છે. કાચી વયે ભોળવાઈને ઘરેથી ભાગી નીકળેલી આવી યુવતીઓને પછીથી આતંકવાદમાં ધકેલવામાં આવે છે ને પછી એમનાં અસ્તિત્વ બળબળતા રણમાં દફનાઈ જાય છે.

ફિલ્મનું ટ્રેલર બહાર પાડવામાં આવ્યું ત્યારથી વિવેક અગ્નિહોત્રીની ધ કશ્મીર ફાઈલ્સની જેમ એની પર વિતંડાવાદ શરૂ થઈ ગયો. એક વર્ગ કહે છે કે આ બિલકુલ સત્ય છે. જો વેળાસર નહીં જાગીએ તો આનાં માઠાં પરિણામ આવી શકે તો બીજો વર્ગ કહે છે કે ધર્મપરિવર્તનની વાત સાચી, પણ ટેરરિસ્ટ બનવાના આંકડા આપવામાં આવ્યા છે એ સદંતર ખોટા છે.

ફિલ્મમાં શાલિનીને ઈન્ટરોગેશન દરમિયાન પૂછવામાં આવે છે કે આઈએસઆઈએસ કબ જોઈન કિયા? તો એનો જવાબ છેઃ ‘આઈએસઆઈએસ કબ જોઈન કિયા યે જાનને કે લિયે કબ ઔર કેસે જોઈન કિયા યે જાનના જ્યાદા જરૂરી હૈ..'