અપગ્રેડ કરે ને અપસેટ ન થવા દે એ પુસ્તક.. કિરીટસિંહ મહિડા

૨૦૦૪માં વાંચનની શરૂઆત થઈ ત્યારથી બિઝનેસ પણ વધતો ગયો. એક મેડિકલ સ્ટોરમાંથી ધીરે ધીરે પંદર થયા. આઠેક બેકરી સ્ટોર થયા, જેમાં અમુક મેડિકલ અને બેકરીમાં પણ નાની નાની લાઈબ્રેરી બનાવી છે. જે ગ્રાહકને રસ પડે તે ફ્રીમાં પુસ્તક ઘરે લઈ જઈને વાંચી શકે

- 

એમનાં ઘર, મેડિકલ સ્ટોર અને બેકરીમાં પુસ્તકો મઘમઘે છે. સુરત જિલ્લાના કીમમાં વસતા બિઝનેસમૅન કિરીટસિંહ ગજેન્દ્રસિંહ મહિડાને પૂછો કે સફળતાનો શૉર્ટ કટ શું? તો એ કહેશેઃ ‘વાંચન. રીડર જ લીડર બની શકે. હું માનું છું કે દરેક સફળ માણસ પાછળ ક્યાંક ને ક્યાંક પુસ્તકપ્રેમ છુપાયેલો છે. વાંચવાથી જાતને અપડેટ અને જીવનને અપગ્રેડ કરી શકાય. અને પુસ્તક તમને ક્યારેય અપસેટ થવા દેતાં નથી. હું મારી સફળતાનું શ્રેય વાંચનને આપું છું. ’

કિરીટસિંહ વ્યવસાયે તો ફાર્મસિસ્ટ. પંદર મેડિકલ સ્ટોર સાથે અતુલ બેકરીની આઠ ફ્રેન્ચાઈઝી ચલાવે, સાથે રક્તદાન ઝુંબેશ પણ ચલાવે, પણ એમનો પહેલો પ્રેમ પુસ્તક. એમનો આ પ્રેમ એમના ઘરની લાઈબ્રેરીમાં પણ જોઈ શકાય છે. અરે, એમના મેડિકલ સ્ટોર અને બેકરીની દીવાલો પર પણ પુસ્તકો દેખાય.