સંસ્કારનગરીમાં વિશ્વનું સૌથી મોટું સૌર કૉન્સન્ટ્રેટર

ધ બિગ ડિશ એ શાનદાર ઑપ્ટિક્સ ધરાવતી અદ્યતન ટેક્નોલૉજી છે, જે આશરે ૨૦૦૦ ડિગ્રી સેલ્સિયસ સુધી તાપમાન અને ૧૬૦ બાર પ્રેશર સુધી વરાળ ઉત્પન્ન કરવા સક્ષમ છે

- 

વડોદરાના વાઘોડિયા તાલુકામાં આવેલા ગોરજ મુનિ સેવા આશ્રમ દ્વારા ઊર્જા ક્ષેત્રે આત્મનિર્ભરતા પામવા તરફ એક વિરાટ પગલું ભરવામાં આવ્યું છે. આ આશ્રમના પરિસરમાં બિગ ડિશ નામના વિશ્વના સૌથી મોટા અને કદની સરખામણીએ સૌથી કાર્યક્ષમ સૌર કૉન્સન્ટ્રેટરનું હમણાં ઉદ્ઘાટન કરવામાં આવ્યું. ઑસ્ટ્રેલિયા નૅશનલ યુનિવર્સિટી (એએનયુ) અને ગોરજ મુનિ સેવા આશ્રમના પરિસરમાં આવેલી કંપની સનરાઈઝ સીએસપી (કૉન્સન્ટ્રેટેડ સોલાર પૅનલ)ના સહયોગથી વિકસાવવામાં આવેલી આ અનોખી પેરાબોલિક સોલાર કૉન્સન્ટ્રેટર ટેક્નોલૉજી વિશ્વસ્તરના સૌરઉદ્યોગ માટે સીમાચિહ્ન બની છે.