અજાણ્યા વ્હૉટ્સઍપ ગ્રુપથી બચવાનું હવે બનશે આસાન

મોબાઈલ ફોનની સૌથી પૉપ્યુલર ઍપનો આ કન્ટ્રોલ હવે આવી રહ્યો છે તમારા હાથમાં.

- 

કોઈ અજાણી વ્યક્તિ એના વ્હૉટ્સઍપ ગ્રુપમાં તમને ઍડ કરે તો તમને પહેલો વિચાર શું આવે? તમારો એ ગ્રુપમાં પહેલો મેસેજ શું હોઈ શકે? ઍડ કરવામાં આવેલા મોટા ભાગના લોકોનો ગ્રુપમાં પહેલો મેસેજ એ હોય છે કે તમે કોણ, શેનું ગ્રુપ છે, કોણે મને ઍડ કર્યો, કંઈ કામધંધો છે કે નહીં? વગેરે.. વગેરે... અને કેટલીક વાર તો ઉગ્ર લેખિત દલીલબાજી પણ ખરી.

હવે કોઈએ તમને ભળતાસળતા ગ્રુપમાં ઍડ કરી જ દીધા છે ત્યારે આ માથાકૂટ વત્તા-ઓછા પ્રમાણમાં થવાની તો પાક્કી છે. કદાચ તમે ગ્રુપમાંથી એક્ઝિટ થવાનું જજમેન્ટ લો તો પણ તમે મોડા જ પડો છો, કારણ કે તમે ગ્રુપ છોડો એ પહેલાં તો ધસમસતા પ્રવાહની જેમ ફોટો અને વિડિયો ગ્રુપમાંથી તમારી ફોન ગૅલરીમાં ઘૂસી જાય છે. આવી નકામી ફાઈલોને ફોનમાંથી શોધી શોધીને ડિલીટ કરવામાં સમયનો જે બગાડ થાય છે તે તમારી હેરાનગતિ વધારી દે છે.

આ મુશ્કેલી તમને નડે જ નહીં એનો કોઈ રસ્તો ખરો? પૂછ્યા વગર કોઈ તમને ગ્રુપમાં ઍડ કરી જ ન શકે તેવું થઈ શકે ખરું? જો આવું થઈ શકે તો થઈ જાય ને તમને ખાસ્સી નિરાંત?