આવી માટી તો સોનું જ પકવે

દરેક છોડવાને આપણે ‘છપ્પન ભોગ’ ધરીએ તો એ ખપપૂરતાં તત્ત્વો એમાંથી મેળવી લેશે.

- પૂર્વી શાહ

– બાલ્કનીમાં સૂર્યપ્રકાશ નથી આવતો, કયા છોડ રાખું?

– માટી પથ્થર જેવી કડક થઈ ગઈ છે, શું કરું?

– મચ્છર ન થાય એવા પ્લાન્ટ સજેસ્ટ કરો ને..

ઓહોહો પ્રિયદર્શિનીનું ઈનબૉક્સ બાગબાનીને લગતા અનેક સવાલોથી છલકાઈ ગયું છે. ગાર્ડન મેજિકમાં આપણે ક્રમવાર આ બધા વિષયો લેવાનાં જ છીએ, છતાં આજે તો ગાર્ડનિંગમાં સૌથી મહત્ત્વના વિષય અર્થાત્ માટીની ચર્ચા કરીએ. માટી એ પૃથ્વીનું ઘન અમૃત છે.

પહેલી વાત. કોઈ પણ હર્યોભર્યો છોડ ફક્ત માટી અને સૂર્યપ્રકાશની કમાલ છે, નહીં કે ખાતર અથવા જંતુનાશકની. ઑક્સિજન ઉપરાંત પૂરતા પ્રમાણમાં ખનિજતત્ત્વો, પોષક દ્રવ્યો સાથે સાત્ત્વિક ઊર્જા મેળવવા માટે આપણે પ્લાન્ટ ઉગાડીએ છીએ, પણ છોડ પોતે જ બીમાર હોય, છતાં આપણે એને જંતુનાશક છાંટીને બચાવી રાખ્યો હોય અથવા જે તત્ત્વો એને માટીમાંથી મળવાં જોઈએ એને બદલે ફર્ટિલાઈઝર દ્વારા આપીએ તો ફળ, ફૂલ કે પાંદડાંમાં કેવી અને કેટલી એનર્જી હશે? એ આપણને કેવી રીતે સ્વસ્થ રાખી શકશે?