યે ક્યા હો રહા હૈ?

રાત-દિવસ કાન ફાડી નાખતા અવાજ સામે દોઢ વર્ષમાં પોલીસને મળી ૧૦ હજારથી વધુ ફરિયાદ.. અને એમાંથી માત્ર એક કેસમાં નોંધવામાં આવ્યો ગુનો!

- મહેશ શાહ (અમદાવાદ)

હેલો, ૧૦૦ નંબર.. ? હું નારણપુરાથી એક સિનિયર સિટિઝન બોલું છું. અમારી સોસાયટી સામેના પાર્ટી પ્લૉટમાં અત્યારે રાત્રે બાર વાગે મોટા અવાજે ગીતો વાગે છે. અમારી ઊંઘ ડિસ્ટર્બ થાય છે.

- સાહેબ, પોલીસ કન્ટ્રોલ રૂમ? અહીંના પાર્ટીનો બહુ ઘોંઘાટ છે. લાઉડસ્પીકરોથી અમે બધા રહેવાસીઓ હેરાન થઈએ છીએ. હૉલવાળા અમારી વાત સાંભળતા નથી. તમે કંઈક કરો તો સારું.

પાછલા દિવસોમાં અમદાવાદના ઘણા લોકોએ પોલીસ કન્ટ્રોલ રૂમને ફોન પર આવી ફરિયાદ કરી હશે. કાંકરિયા નજીક રહેતા યુવાન ઍડ્વોકેટ કૈવાન દસ્તૂરે ઘર પાસેના પાર્ટી પ્લૉટમાં રાત્રે મોટા અવાજે વાગતાં મ્યુઝિકથી પોતાની ઊંઘ ડિસ્ટર્બ થતી હોવાની રજૂઆત કરી, પરંતુ અપેક્ષિત પરિણામ ન આવ્યું. જો કે કૈવાને નિરાશ થયા વિના ધ્વનિપ્રદૂષણને જનસમસ્યા ગણી એના ઉકેલના પ્રયાસો આરંભ્યા.

એ માટે કૈવાને અમદાવાદ શહેર અને ગ્રામીણ પોલીસના કન્ટ્રોલ રૂમ પાસેથી રાઈટ ટુ ઈન્ફોર્મેશન હૉલમાં ડીજે (આરટીઆઈ) કાયદા દ્વારા માહિતી માગી કે લાઉડસ્પીકર કે ડીજે ટ્રક દ્વારા લાઉડ મ્યુઝિક વગાડવા સામે જાન્યુઆરી, ૨૦૨૧થી ૧૩ જૂન, ૨૦૨૨ સુધીમાં કેટલી ફરિયાદ મળી? એ બદલ ક્યારે શું પગલાં લીધાં? વગેરે.

પોલીસનો જવાબ મળ્યોઃ વર્ષ ૨૦૨૧માં ૭૫૦૦ સહિત ૧૦,૨૨૭ ફરિયાદ મળી.

એ પછી પોલીસની પરવાનગી વિના લાઉડસ્પીકર વગાડવા બદલ દંડ, સાઉન્ડ લિમિટર વિનાનાં લાઉડસ્પીકરનાં ખરીદ-વેચાણ, વગેરે માહિતી મેળવવા પણ કૈવાને આરટીઆઈ જંગ ખેલવો પડ્યો. એમણે અમદાવાદ શહેર અને ગ્રામીણ વિસ્તારનાં પોલીસસ્ટેશનોને ૭૦ જેટલી આરટીઆઈ અરજી મોકલી.

એનો જવાબ આવ્યોઃ શાહીબાગ પોલીસે એક ડીજે ટ્રકવાળા સામે ઊંચા અવાજે ડીજે વગાડવાનો તથા દાણીલીમડા પોલીસે એક ડીજે ટ્રકવાળા સામે માસ્ક ન પહેરવાનો ગુનો નોંધ્યો હતો.

કેવું કહેવાય? પોલીસ કન્ટ્રોલ રૂમને વર્ષમાં સાડા સાત હજાર ફરિયાદ મળે. એ પછી સમસ્યાના ઊંડાણમાં જવાનો કે ઉકેલ શોધવાનો લગીરેય પ્રયાસ ન થયો?!