આ માત્ર વ્યસન નહીં, પણ ગુલામી છે ગુલામી!

ગેજેટ વિના ખુલ્લામાં રમાતી દેશી રમતોમાં બાળકોને વ્યસ્ત અને ખુશ રાખવાની પૂરી ક્ષમતા છે.

- 

ડૉ. રાજેન્દ્ર બર્વે: શાળા-કૉલેજના કંટાળાજનક અભ્યાસક્રમને કારણે પણ વિદ્યાર્થીઓ ગેમિંગના રવાડે ચડે છે.

વિડિયો ગેમ્સ, મોબાઈલ ગેમ્સ કે ઑનલાઈન ગેમ્સના બાંધાણી તરુણો કોઈક વખત હતાશામાં સરી પડે, આપઘાત કરે કે હિંસક થઈને કોઈને મારી બેસે એવા કિસ્સા બનતા જ રહે છે. ૧૯૯૭માં અમેરિકાના ઓહાયો રાજ્યના ૧૬ વર્ષી ડેનિયલ પેટ્રિકે એનાં માતા-પિતાને ભડાકે દીધાં હતાં, કારણ કે એમણે ડેનિયલની વિડિયો ગેમ છીનવી લીધી હતી. પિતા બચી ગયા, પણ મા મરી ગઈ. ડેનિયલને જન્મટીપ થઈ.

૨૦૧૮માં દિલ્હીના ૧૯ વર્ષી સૂરજે એનાં મા-બાપ અને નાની બહેનની ચાકુથી ઠંડે કલેજે હત્યા કરી ત્યારે પોલીસતપાસમાં બહાર આવ્યું કે સૂરજ કૉલેજમાં ગાપચી મારીને એના ભાડાના રૂમમાં સવારે સાતથી સાંજે છ વાગ્યા સુધી પબજી રમતો હતો.

૨૦૨૦માં પંજાબમાં બાર વર્ષના એક છોકરાને મા-બાપે પબજી રમતાં ટોક્યો એટલે એણે ભાકરા કૅનાલમાં ઝંપલાવીને આપઘાત કર્યો હતો.

૨૦૨૧માં ચીનમાં એક ગેમર મિહોયો નામની ગેમિંગ કંપનીના સ્થાપકોની હત્યાનું આયોજન કરતાં પકડાયો હતો. આ ગેમર મિહોયોની ગેમ હોન્કાલ ઈમ્પેક્ટનો બંધાણી હતો અને મિહિયોએ ગેમમાં નવા અપડેટ આપ્યા એનાથી નાખુશ હતો. જો કે પોલીસે એને સમયસર પકડી લીધો હતો.